Bakıda futbol günü başa çatdı.

Avropa Liqasında "Qarabağ" HİK-i qəbul edirdi. Oyun ağdamlıların üstünlüyü şəraitində başladı. "Köhlən atlar" 4-cü dəqiqədə Yankoviçlə hesabı açsa da, VAR-ın müdaxiləsindən sonra hakim qolu qeydə almadı. Azərbaycan çempionu ilk yarıda saysız-hesabsız qol imkanlarından yararlana bilmədi.

İkinci hissənin əvvəlində isə Qurban Qurbanovun komandası oyuna tam nəzarət edirdi. Bunun nəticəsində 55-ci dəqiqədə Zubirin ötürməsindən sonra Andrade hesabı açdı. "Köhlən atlar"dan növbəti qolları gözlədiyimiz ərəfədə qonaqlar bərabərlik topunu vurdu. Olusanya müdafiəçilərin səhvindən yararlanaraq Şahruddini məyus etdi. Əslində qonaqlar bu görüşdə qalib də gələ bilərdilər. Lakin ardıcıl imkanlardan yararlana bilmədilər. Bir məqamda qapı dirəyi, iki dəfə Şahruddin komandamızı real qoldan xilas etdi. Oyunun taleyi isə 85-ci dəqiqədə Juninyonun vurduğu qolla həll olundu. Beləliklə, ağdamlılar doğma meydanda çətin qələbə qazanaraq növbəti mərhələ şansını əlində saxladı.

Konfrans Liqasında ilk dəfə mübarizə aparan "Sabah" yaxşı mənada təəccübləndirməyə davam edir. "Bayquşlar" "Partizan"la görüşə fırtına kimi başladı. Sanki avrokuboklarda debütant Belqrad təmsilçisi idi. İlk hissədə Masazır təmsilçisi 3-4 real imkandan yararlana bilmədi. Fasilədən sonra da "tələbələr" şou göstərirdi. Yeni transferlər serbiyalıların başına oyun açırdı desək, yanılmarıq. 69-cü dəqiqədə İsayev penaltidən yararlana bilməsə də, bir dəqiqə sonra Letiç möhtəşəm zərbə ilə hesabı açdı. Qoldan sonra da bakılılar dayanmaq bilmirdi. 4 dəqiqə sonra İsayev özü də fərqləndi. Yekunda "Sabah" "Partizan"ı 2:0 hesabıyla məğlub etdi. Bu görüşdə təmsilçimiz daha çox qol vura bilərdi. Hər halda, "Sabah"ın Konfrans Liqasında ardıcıl üç görüşdə qələbə qazanması Azərbaycan futbolu adına böyük uğurdu.

"Futbol günü"ndə tək kədərli məqam "Neftçi" ilə bağlı oldu. Onsuz da flaqmanın "Beşiktaş"a uduzacağı əvvəlcədən bəlli idi. Amma istanbulluların belə asan qələbə qazanması gözlənilməz idi. 14-cü dəqiqədə Abubakar hesabı açdı, 23-cü dəqiqədə də Muleka fərqi artırdı. Fasilədən sonra isə Salih 3-cü topu qapımızdan keçirdi. Oyunun sonlarında "Neftçi" tempi artıraraq qollardan birinin əvəzini çıxdı. Amma flaqmanın bundan artığına gücü çatmadı. Beləliklə, "Beşiktaş" səfərdən sərfəli nəticə ilə İstanbula geri döndü.

Görünən odu ki, "Qarabağ"ı HİK-lə çətin səfər oyunu gözləyir. "Sabah" isə Belqradda "Partizan"a minimal hesabla uduzsa da, mərhələ keçəcək. Amma “Neftçi"nin işi Allaha qalıb.

İLKİN SULTANLI