Məlum olduğu kimi bir müddət öncə Türkiyə futbolunda hakimlik sahəsindəki böyük bir qalmaqalın üstü açılmışdı.

Türkiyə Futbol Federasiyası oyunlara pul qoyuluşu edən 152 hakimin adını bir-bir açıqlamış və məsələyə prokurorluq da qoşulmuşdu. Onlardan 149-na 8-10-12 aylıq cəzalar verilmişdi. 3 hakimlə bağlı isə araşdırma davam edir ki, onlardan biri də FİFA hakimi Zorbay Küçükdü.

Bu arada həmin 152 hakim ümumi şəkildə yazılı bir açıqlama verib. Onlar ilk növbədə mərc saytlarında aktiv hesablarının olması və aktiv pul qoyuluşu etmələri, eləcə də öz idarə etdikləri qarşılaşmalara pul qoymaları barədə yayılan şayiələri qətiyyətlə təkzib ediblər. Ədalət təmsilçiləri dolayı yolla da olsa, müxtəlif pul qoyuluşları etdiklərini təsdiqləyiblər. Ancaq onlar böyük əksəriyyətinin 4-5 il öncə həvəskar səviyyədə hakimlik edərkən bu işlə məşğul olduqlarını, peşəkar səviyyəyə yüksəldikdən sonra isə bu işin başını buraxdıqlarını vurğulayıblar.

Hakimlər həm də illərdi, xidmət etdikləri qurum, yəni
TFF tərəfindən bu cür çarəsiz şəkildə ictimaiyyət önündə hədəf göstərilmələrini böyük üzüntü ilə təqib etdiklərini bildiriblər. Onlar ''təmiz əllər'' əməliyyatında sadəcə qurbanlıq qoyun olduqlarını və real olmayan faktlar üzündən indiyə qədərki bütün əziyyətlərinin yerə vurulduqlarını bildiriblər.