Mərc oynamaqda günahlandırılan türkiyəli FİFA hakimi prokurorluğa gəlib şikayət etdi!
Türkiyədə oyunlara pul qoyuluşu etməkdə günahlandırılan bəzi hakimlərin adlarının açıqlandığını xəbər vermişdik.
Türkiyə Futbol Federasiyası tərəfindən mərc oynamaqda günahlandırılan ümumilikdə 152 hakimin adı açıqlanmışdı. Onların arasında ən diqqətçəkən isim Zorbay Küçük idi. FİFA hakimi statusunda olan Küçük kifayət qədər tanınan simalardandı və indiyə qədər superliqada bir çox önəmli oyunlarda fit sahibi olub.
Bu arada 33 yaşlı ədalət sahibi belə desək, özü əks-hücuma keçib. O bu gün səhər saatlarında vəkili ilə birlikdə İstanbul Cümhuriyyət Prokurorluğuna gəlib. Əvvəlcə onun ifadə vermək üçün prokurorluğa çağırıldığı düşünülsə də, bu hakim öz növbəsində şikayət etmək üçün gəlibmiş. Prokurorluğun önündə türkiyəli həmkarlarımıza açıqlamalar verən Küçük bütün ittihamları rədd edərək bunları deyib:
''Şikayətçi olmaq üçün gəlmişəm. Bilirsiz ki, hakimlərin icazəsiz açıqlama verməsi qadağandı. Amma indi çox qeyri-adi bir durum yaşanır. Ümid edirəm ki, bağlı olduğum qurum bu açıqlamalarımı anlayışla qarşılayacaq. Çünki bunu həm həmin qurumu, həm də özümü qorumaq üçün edirəm. Tam səmimi deyirəm ki, mən tək hakimlik karyeram ərzində yox, ondan öncə də heç bir mərc saytlarında qeydiyyatdan keçməmişəm. Heç bir hesab açmamışam və pul qoyuluşu etməmişəm. Nəinki futbola, heç bir idman növünə! Həqiqəti üzə çıxarmaq üçün burdayam. Şikayət üçün hər şeyi hazırlamışıq. Əslində daha uzun və geniş açıqlamalar vermək istərdim. Amma işimlə əlaqəli olaraq bunu edə bilmirəm. Mənim adıma açılan hesablardan şikayətçiyəm. Mənim adıma Türkiyə Cümhuriyyəti vəsiqəmdən istifadə edilərək bir neçə hesab açılıb. Qalanını vəkilim anladacaq''.
Hakimin vəkili bəzi detalları açıqlayıb. Onun sözlərindən belə aydın olur ki, Zorbay Küçükün adına iki müxtəlif mərc saytında saxta hesab açılıb. Vəkilin iddiasına görə bunu Türkiyə yox, xarici ölkə vətəndaşı edib. Küçükün vəsiqəsi həmin şəxsin əlinə keçib.
Digər xəbərlər
