Premyer-liqa təmsilçisi ''Brentford''un şərəfini qoruyan və məhsuldarlığı ilə diqqət çəkən Ayven Toni ilə bağlı qalmaqallı xəbər yayılıb.

26 yaşlı futbolçunun oyunlara pul qoyuluşu etdiyi məlum olub. Toni 2017-nin fevralından 2021-in yanvarına qədər ümimilikdə kontorlar vasitəsilə 232 dəfə pul qoyuluşu edibmiş. İngiltərə Futbol Assosiasiyası onu pul qoyuluşu ilə bağlı reqlamenti pozmaqda günahlandırıb. Forvardın bu ittihamlara cavab vermək və özünü müdafiə etmək üçün noyabrın 24-nə qədər vaxtı var.

Son turda səfərdə ''Mançester Siti''yə 2 qol vurmaqla diqqət çəkən Toni bu mövsüm premyer-liqada 10 qol vurub və hazırda bombardirlər yarışında Erlinq Holann (18) və Harri Keyndən (12) sonra 3-cü pillədə qərarlaşıb. Amma bu cür məhsuldarlığa baxmayaraq İngiltərə yığmasının baş məşqçisi Qaret Sautqeyt onu DÇ-yə yollanan heyətə salmayıb.