Seneqallı qapıçı Şeyx Ture Qanada faciəvi şəkildə həyatını itirib. Məlumatı Seneqalın Xarici İşlər Nazirliyi yayıb.

"Football-plus.az" xəbər verir ki, 17 yaşlı Şeyx dələduzluq və quldurluqla məşğul olan bir dəstənin qurbanı olub.

“Esprit Foot Yeumbeul” klubunun yetirməsi olan və gələcəyi parlaq futbolçu kimi görülən Ture peşəkar komandada baxışdan keçiriləcəyi vədi ilə aldadılıb. İnsan alveri ilə məşğul olan şəxslər tərəfindən qaçırılan gənc futbolçunun ailəsindən pul tələb olunub. Lakin tələb edilən məbləğ ödənilmədiyi üçün Şeyx öldürülüb.

Qananın paytaxtı Akkradakı Seneqal Konsulluğundan bildirilib ki, futbolçunun meyiti Aşanti bölgəsinin Tafo şəhərindəki “Ebenezer” meyitxanasına gətirilib. Yerli hakimiyyət orqanlarından ölümün dəqiq səbəblərinin müəyyənləşdirilməsi üçün geniş araşdırma aparılması istənilib.