Afrika futbolundan acı xəbər gəlib. Gənc seneqallı qapıçı Şeyx Ture faciəvi şəkildə öldürülüb.

Olayı Seneqalın xarici işlər nazirliyi də təsdiqləyib. Qapıçının yaşı barədə dəqiq məlumat verilmir. Amma ''Espirit Foot Yeumbeul'' akademiyasının yetirməsi olan Ture peşəkar futbola keçmək arzusunda idi və özünə klub axtarırdı. Məhz bu arzusu ona başa gəldi.

İddialara görə, Ture bir qrup şəxslə tanış olubmuş. Onlar gənc əlcək sahibinə futbol dünyasında əlaqələrinin olduğunu bildirərək ona peşəkar klub tapacaqlarını deyiblər və Mərakeşə aparmaq adı ilə əslində Qanaya aparıblar.

Həmin şəxslər əslində dələduz və soyğunçular imiş. Onlar Qanaya çatdıqdan sonra futbolçunun ailəsinə zəng vuraraq külli miqdarda pul tələb ediblər. Ailənin isə bu pulu ödəməyə imkanı olmayıb. Nəticədə Şeyx Ture həmin şəxslər tərəfindən qətlə yetirilib.

Hadisə ilə bağlı geniş araşdırmaya başlanılıb. Qana və Seneqal polisinin günahkarların tapılması istiqamətində birlikdə hərəkət etdiyi deyilir.