DÇ-2026-nın seçmə mərhələsinin I qrupunda Norveç İsraili asanlıqla məğlub edərək liderliyini davam etdirdi.

"Football-plus.az" xəbər verir ki, rəqibini 5 cavabsız qolla darmadağın edən Norveç 6-cı oyunda 6-cı qələbəsini qazandı. Erlinq Holann yığma səviyyəsində ilk böyük turnirinə bir addım da yaxınlaşdı. Bu qarşılaşmaya da məhz Holann damğa vurdu. O, matçın əvvəllərində penaltidən yararlana bilmədi. Özü də ardıcıl iki dəfə!

İsrailin qapıçısı dəf etdiyi ilk penaltidə qapı xəttindən irəli çıxdığına görə zərbə təkrar edildi. Forvardın ikinci zərbəsini də qapıçı qaytardı. Amma ''Mançester Siti''nin qoleadoru həvəsdən düşmədi və komandasının vurduğu 5 qoldan 3-nü aktivinə yazaraq het-trik etdi. Holann klub və yığma səviyyəsində ardıcıl 10-cu rəsmi oyunda meydanı qolsuz tərk etmədi! Bu qarşılaşmalarda onun aktivində 19 qol var.

Ən əsası Holann yığmada keçirdiyi 46-cı oyunda vurduğu qolların sayını 51-ə çatdırdı. Bununla da o, futbol tarixində əsas yığma səviyyəsində 50 qol həddinə ən tez çatan futbolçu oldu! Əvvəlki rekord Harri Keynə məxsus idi. İngiltərə yığmasının kapitanı 50-ci qolunu 71-ci oyunda vurmuşdu.

Maraq üçün bildirək ki, yığmada 50 qol həddinə müasir dönəmin ulduzlarından Neymar 74-cü, Mbappe və Levandovski 90-cı, Messi 107-ci, Kriştiano Ronaldo isə 114-cü oyunda çatıb.