Erlinq Holann ağlasığmaz məhsuldarlığını davam etdirərək İngiltərə futbolunda yeni cığır açmaqda davam edir.

“Football-plus.az” xəbər verir ki, dünən premyer-liqanın 31-ci turunda ''Mançester Siti'' öz meydanında ''Lester''lə qarşılaşmada problem yaşamayaraq 3:1 hesabı ilə qalib gəldi və lider ''Arsenal''ın təqibini davam etdirdi. Holann hələ ilk yarıda dubl etdikdən sonra Xosep Qvardiola qarşıdan gələn ''Bavariya'' ilə cavab oyununu düşünərək onu fasilədə əvəzlədi. Həm rəsmi matçlarda ardıcıl 10-cu qələbəsini qazanan ''Siti'', həm də bu mövsüm 40-cı rəsmi oyunda vurduğu qolların sayını 47-yə çatdıran Holann əla formadadı. Norveçli qoleador ardıcıl 6-cı rəsmi qarşılaşmada meydanı qolsuz tərk etmədi. Bu oyunlarda o, 14 dəfə fərqlənib!

22 yaşlı futbolçu premyer-liqada vurduğu qolların sayını 32-yə çatdırmaqla indidən ''Liverpul''lu Məhəmməd Salahın rekordunu təkrarlayıb. Premyer-liqanın 38 turdan ibarət olduğu dönəm üçün bir mövsümə ən çox fərqlənən futbolçu Salah idi. O, 2017/18-də 32 qol vurmuşdu. Amma mütləq rekord hərəyə 34 qol vuran Endi Koul (1993/94) ilə Alan Şirerə (1994/95) məxsusdu. Düzdü, həmin illərdə elitada 22 komanda olduğundan mövsüm 42 turdan ibarət idi. Holannın hələ ehtiyatda 8 oyunu var və onun mütləq rekordçuya çevriləcəyi şübhə doğurmur. Ən diqqətçəkən məqam odu ki, Holann 32 qolla premyer-liqada bu mövsüm ''Çelsi'' (!) də daxil olmaqla 8 klubdan daha çox top vurub. Bu klubların siyahısına heyəti ulduzlarla dolu olan və cəmi 30 qol vuran London nəhəngindən başqa ''Kristal Pelas'' (31), ''Bornmut'' (31), ''Vest Hem'' (27), ''Vulverhempton'' (26), ''Everton'' (24), ''Nottingem Forest'' (24) və ''Sauthempton'' (24) daxildi.