İnanılmaz formada olan Viktor Osimhen tək klubda yox, yığma komandada da qarşısıalınmazdı.

''Football-plus.az'' xəbər verir ki, bu mövsüm ''Qalatasaray''da 30 rəsmi oyuna 26 qol vuran ulduz futbolçu vətəni Nigeriya yığmasını da çiynində daşımaqda davam edir.

Martın 21-də Nigeriya DÇ-2026-nın seçmə mərhələsi çərçivəsində Ruandanın qonağı oldu. Qonaqların 2 cavabsız qolla qalib gəldiyi oyunda hər iki qolu aktivinə məhz Osimhen yazdı. 26 yaşlı forvard hələ fasiləyə qədər dubl edərək ikinci hissənin komandası üçün asan keçməsinə şərait yaratdı.

Maraqlıdı ki, Nigeriya seçmə mərhələdə yer aldığı C qrupunda keçirdiyi 5-ci qarşılaşmada yalnız 1-ci qələbəsini əldə etdi. Komanda növbəti oyununu martın 25-də evdə Zimbabveyə qarşı keçirəcək. Osimhen klub və yığma səviyyəsində keçirdiyi son 8 rəsmi oyunda 11 dəfə fərqlənib! Son iki qol sayəsində ''Qalatasaray''ın hücumçusu həm də önəmli bir göstəriciyə nail oldu. Osimhen yığmada 39-cu oyunda vurduğu qolların sayını 25-ə çatdırdı.

Bununla da o, 1976-82-ci illərdə yığmada oynamış və 46 oyuna 23 qol vurmuş Sequn Odeqbamini geridə qoyaraq Nigeriya yığması tarixində ən çox qol vuran futbolçuların siyahısında 2-ci pilləyə yüksəldi. Siyahıda lider isə Rəşidi Yekinidi. 1984-98-ci illərdə yığmada oynamış və 2012-ci ildə 48 yaşında dünyasını dəyişmiş əfsanəvi forvard 58 oyuna 37 dəfə fərqlənib.

Osimhenin karyerasının böyük hissəsinin hələ irəlidə olduğunu nəzərə alsaq, onun bu siyahıda zirvəyə yüksələcəyi şübhə doğurmur.

ƏLİ