Dünən İngiltərə çempionatının 30-cu turunda ''Mançester Siti'' səfərdə ''Sauthempton''u 4:1 hesabı ilə darmadağın edərək lider ''Arsenal''ın təqibini davam etdirdi.

“Football-plus.az” xəbər verir ki, ''Siti''də ilk mövsümünü keçirməsinə baxmayaraq Erlinq Holann fenomenal məhsuldarlıq nümayiş etdirməkdə davam edir. Dubl edən norveçli ''qol maşını'' ardıcıl 4-cü rəsmi oyunda fərqlənməyi bacardı. Özü də o, bu 4 qarşılaşmada 11 qol vurub! 22 yaşlı futbolçu premyer-liqada bu mövsüm 27-ci oyununda vurduğu qolların sayını 30-a çatdırdı. Turnirin tarixində 30 qol həddinə belə tez çatan futbolçu olmamışdı. Premyer-liqada bir mövsümə ən çox qol vurmaqla bağlı rekord 2017/18-də 32 qol vuran ''Liverpul''lu Məhəmməd Salaha məxsusdu. Düzdü, 1993/94-də Endi Koul ''Nyukasl''ın heyətində, 1994/95-də Alan Şirer ''Blekbern''in heyətində hərəyə 34 qol vurub. Amma həmin mövsümlərdə premyer-liqa 38 yox, 42 turdan ibarət idi. Yeri gəlmişkən, Kevin De Bruyne də maraqlı göstəriciyə nail olub. Holannın hesabı açmasına şərait yaradan belçikalı ulduz premyer-liqada 237-ci oyunda yubiley 100-cü məhsuldar ötürməsini verdi. De Bruyne turnirin tarixində 100 məhsuldar ötürmə həddinə ən tez çatan futbolçu oldu!

Əvvəlki rekord Sesk Fabreqasa (293 oyun) məxsus idi. Ümumilikdə premyer-liqada ən çox məhsuldar ötürmə verən futbolçu Rayan Giqqzdi (162).