DÇ-2026-nın seçmə mərhələsinin oyunları davam edir.

Dünən maraqlı qarşılaşmalardan biri Osloda keçirildi. ''Ullevol'' stadionunda Norveç İtaliyanı qəbul etdi. Düşünmək olardı ki, son iki mundialdan kənar qalmaqla fanatlarına şok yaşadan İtaliya bu dəfə seçmə mərhələyə daha məsuliyyətli yanaşacaq. Ancaq dördqat dünya çempionu yenə futbol ictimaiyyətini pis mənada təəccübləndirdi.

Aleksander Sörlot, Antonio Nusa və Erlinq Holannın hələ ilk yarıda vurduğu qollarla Norveç güclü rəqibini 3:0 hesabı ilə darmadağın etdi! Bir neçə gün öncə Çempionlar Liqasının qalibi olan və finalda qapısını toxunulmaz saxlayan Canluici Donnarumma bu dəfə bir hissəyə 3 top buraxdı.

Holann Norveçin heyətində ardıcıl 5-ci oyunda meydanı qolsuz tərk etmədi. Böyük fərqlə bu komandanın tarixinin ən məhsuldar oyunçusu statusunda olan ulduz forvard yığmada 42-ci oyunda vurduğu qolların sayını 41-ə yüksəltdi. Bu, Norveçin qrupda artıq 3-cü oyunu idi və komanda maksimum xalla inamla turnir cədvəlinə başçılıq edir. ''Skuadra Adzurra'' isə qrupda keçirdiyi ilk qarşılaşmada pərən-pərən düşdü.

Baş məşqçi Luçano Spallettinin oyunsonrası mətbuat konfransında İtaliya Futbol Federasiyası ilə söhbət edəcəyini dilə gətirməsi diqqət çəkdi.

İtalyanlar üçün DÇ-nin seçmə mərhələsi son illərdə sanki bir kabusa çevrilib. DÇ-2022-nin seçmə mərhələsinin pley-offunda komandanın Şimali Makedoniyaya 0:1 uduzduğunu nəzərə alsaq, İtaliya tarixində ilk dəfə mundialın seçmə mərhələsində ardıcıl 2 oyundan məğlubiyyətlə ayrıldı və ardıcıl 3 oyunda qola həsrət qaldı.

Bundan başqa daha öncə İtaliyanın DÇ-nin seçmə mərhələsi çərçivəsindəki bir oyunun ilk yarısında 3 qol buraxması faktına da rast gəlinməmişdi.