Mbappe - Arda tandemi yenə iş başında - fransalı ulduz ÇL-in rekordunu təkrarladı
Çempionlar Liqasında əsas mərhələnin 2-ci turunda ''Real'' gözlənildiyi kimi Qazaxıstanda ciddi problem yaşamadı. ''Kral klubu'' ''Kayrat'' ilə səfər oyununda ilk yarıda yalnız bir qol vursa da, yekunda 5:0 hesablı inamlı qələbə qazandı.
Het-trik edən Kilian Mbappe matçın qəhrəmanı oldu. Digər qolları isə Eduardo Kamavinqa ilə Braim Dias vurdu. ÇL-də vurduğu qolların sayını 60-a çatdıran fransalı ulduz Tomas Mülleri (57) geridə qoyaraq turnirin ən məhsuldar oyunçuları siyahısında 6-cı pilləyə yüksəldi. Mbappe bir göstəricidə isə turnirin rekordunu təkrarladı.
Belə ki, o, ÇL-də səfər oyunlarında artıq 3-cü het-trikini rəsmiləşdirdi! Bunu daha öncə yalnız bir futbolçu - sabiq italiyalı forvard Filippo İnzaqi bacarmışdı. Maraq üçün Lionel Messi ilə Kriştiano Ronaldonun ÇL-də səfər oyunlarında yalnız iki het-triklərinin olduğunu bildirək.
Ümumilikdə Mbappe ÇL-də 4-cü het-trikini reallaşdırdı. Bu mövsüm onun aktivində artıq 13 qol, 1 məhsuldar ötürmə var. Xabi Alonsonun təyinatından sonra komandada daha önəmli rol oynamağa başlayan Arda Gülər də aktivinə növbəti məhsuldar ötürmə yazdı. Onun Mbappe ilə tandemi diqqət çəkir. Bu mövsüm bu ikili ''Real''a artıq 5 qol qazandırıb!
Ümumilikdə cari ''futbol ili''ndə türkiyəli yarımmüdafiəçi 10 rəsmi oyunda aktivinə 3 qol, 5 məhsuldar ötürmə yazıb. Mbappe ''Kayrat''la oyundan sonra həm Arda, həm də vurduğu 3 qola rəğmən önəmli fürsətləri boşa verməsi haqda danışaraq bunları deyib:
''Arda Gülər ilə münasibətlərim əladı. Gənc və çox istedadlı futbolçudu. İnanılmaz potensiala malikdi və ona yardım etməliyik. Onun kimi futbolçuya sahib olduğumuz üçün sevincliyik. Mənim kimi bir futbolçu üçün oyunda 5 fürsət yaranırsa, onların hamısını qola çevirməliyəm. ''Real'' məni məhz buna görə transfer edib. Hər zaman daha artığını istəyirəm. Bu gün 3 qol vursam da, bundan artığını vura bilərdim. Qapı önündə daha təhlükəli olmağa çalışmalıyam''.
