La Liqanın sonuncu turunda ''Real'' doğma fanatları önündə ''Real Sosyedad''ı qəbul etdi.

Karlo Ançelotti və Luka Modriçin ''Santyaqo Bernabeu'' publikası ilə vidalaşdığı oyunda Madrid nəhəngi sürprizə imkan vermədi. ''Kral klubu'' Kilian Mbappenin dublu sayəsində 2:0 hesablı inamlı qələbə qazandı.

''Real''ın faktiki olaraq mövsümü titulsuz başa vurmasına baxmayaraq, fransalı ulduzun Madriddəki ilk ilində göstəriciləri diqqət çəkir. Mbappe ''Real''da 56-cı rəsmi oyunda vurduğu qolların sayını 43-ə çatdırdı. O, bu qollardan 31-ni çempionatda, 7-ni Çempionlar Liqasında, 2-ni ölkə kubokunda vurubsa, eləcə də İspaniya superkuboku, Avropa superkuboku və Qitələrarası kubokun hərəsində 1 dəfə fərqlənib.

İlk mövsüm üçün bu, inanılmaz rəqəmdi. Buna qədər ''Real''da ilk mövsümdə bir futbolçu maksimum 37 qol vurmuşdu. Mbappe ''blankos''un heyətində La Liqada 30 qol həddinə çatan cəmi 4-cü futbolçu oldu.

Daha öncə bunu bir dəfə Alfredo Di Stefano, iki dəfə Uqo Sançes və 6 dəfə Kriştiano Ronaldo bacarmışdı. Ən əsası Mbappe ''Qızıl buts'' uğrunda mübarizədə xalını 62-yə yüksəldərək Viktor Dyokereşi geridə qoydu. İsveçli forvard ''Sportinq''in heyətində Portuqaliya çempionatında 39 qol vurub. Amma Portuqaliyada bir qol 1,5 əmsala bərabər olduğundan Dyokereş geridə qalıb. Onun artıq Mbappeni keçmək şansı qalmayıb. Çünki Portuqaliyada mövsüm bitib.

İndi Mbappeni yalnız ''Liverpul''lu Məhəmməd Salah geridə qoya bilər. Onun 27 qolu var. Amma misirli ulduz Mbappeyə çatmaq üçün son turda ''Kristal Pelas''a 3, liderliyə yüksəlmək üçün isə 4 qol vurmalıdı. Ardıcıl 23-cü mövsümdə ''Qızıl buts''u ''böyük beşlik''də top qovan futbolçu qazanacaq.

Sonuncu dəfə ''böyük beşlik''dən kənarda oynayan futbolçulardan bu mükafatı 2001/02-də Mario Jardel qazanıb. O, həmin vaxt ''Sportinq''in heyətində Portuqaliya çempionatında 42 qol vurmuşdu.