Çempionlar Liqasında srağagün keçirilən qarşılaşmalarla 1/8 finalın bütün iştirakçıları bəlli oldu.

''Football-plus.az'' xəbər verir ki, böyük maraqla gözlənilən ''Real'' İlə ''Mançester Siti''nin cavab oyununda intriqa yaşanmadı. İlk görüşdə səfərdə qalib gələn Madrid nəhəngi evdə də rəqibindən bir baş üstün futbol sərgilədi.

''Santyaqo Bernabeu''dakı qarşılaşma Kilian Mbappenin benefisinə çevrildi. Son oyunlarda əla məhsuldarlıq nümayiş etdirən fransalı superulduz 3:1-lik qələbədə komandasının vurduğu hər 3 qolu aktivinə yazdı. 26 yaşlı forvard bununla da ''Real''ın heyətində 38-ci rəsmi oyunda ilk dəfə het-trik edərək vurduğu qolların sayını 28-ə çatdırdı. Mbappe ÇL-də Xosep Qvardiolanın komandalarına qarşı vurduğu qolların sayını 7-yə çatdıraraq bu göstəricidə lider olan Lionel Messini yaxaladı. Beləliklə, ''Real'' iki oyunun nəticəsinə görə 6:3 hesablı inamlı qələbə qazanaraq adını ən güclü 16 kollektiv sırasına yazdırdı.

ÇL-də 1/8 finalın tətbiq olunmağa başlandığı 2003/04 mövsümündən bu yana ''Real'' daim bu mərhələdə yer alıb. Avropada başqa heç bir klub bu cür göstərici ilə öyünə bilməz! ''Mançester Siti''yə gəlincə, bu komanda 2012/13-dən bu yana ilk dəfə 1/8 finalda yer almayacaq. Eyni şəkildə Qvardiola da acı bir ilki yaşamalı oldu. Məşqçi karyerasında ilk dəfə onun çalışdırdığı komanda 1/8-ə yüksələ bilmədi.

ƏLİ