Aşkar autsayder “Kəpəz”i çıxsaq, “Neftçi” 6 turu arxada qalan cari mövsümdə ən az qol vuran komandadı. Bu üzdən “ağ-qaralar”ın əlimyandıda hücumçu axtarması təbiidi. Onların baş məşqçisi Samir Abasov də “Karvan-Yevlax”la oyundan sonra Vinsent Abubakarla danışıqlar apardıqlarıı təsdiqləyib. Bəs kamerunlu futbolçu “Neftçi”də uğurlu ola bilərmi?

Karyerası çempionatımıza baxanda çox böyükdü. “Loryan”, “Portu”, “Beşiktaş”, “Əl-Nəssr” kimi klublarda oynayıb. Çempionlar Liqasında 24 oyuna 13 qol vuran mərkəz hücumçusu karyerası ərzində 429 oyuna çıxıb, 171 qol, 55 məhsuldar ötürmə ilə yadda qalıb, iki dünya çempionatında iştirak edib. Elə də pis statistika deyil. Amma bu Abubakar o Abubakardımı?

İki mövsüm əvvəl “Beşiktaş” onu göndərmək üçün əlindən gələni etdi. Ehtiyat oyunçular skamyasında saxladı, heyətdən çıxardı… Nəhayət, kamerunlu gedəndə də bütün “Beşiktaş” azarkeşləri bir-birini təbrik etdi. Vinsent 2023/24 mövsümünü “qartal”ın heyətində yaxşı nəticələrlə başa vursa da, ötən mövsüm ağır vəziyyətdə olan “Hatayspor”a gəldi. Zəif klubda fərq yarada bilmədi, kamerunlunun komandası 1-ci liqaya yuvarlandı.

Hazırda cəmi 1,2 milyon avro “transfermarkt” dəyəri var. “Neftçi”nin bir neçə futbolçusundan daha az qiymətdi. Yəni komandaya gəlsə, ən çox maaş alan futbolçu olsa, Cenk Sümərin yaratmağa çalışdığı maddi balans yenidən pozulacaq. Azərbaycan çempionatı başqa ölkələrə nisbətdə zəif görünə bilər, amma zəif olduğu qədər də çətindi. Güclü yox, çətin. Burda Abubakarın “baş çıxaracağına” heç kim zəmanət vermir. 33 yaşı olan Vinsentin karyerası artıq üç mövsümdü tükənib. Bunu qəbul etmək lazımdı. “Neftçi”yə xeyir verəcəyi də böyük sual altındadı.

İki mövsüm əvvəl “Neftçi”yə Konfrans Liqasının təsnifat mərhələsinin hər iki oyununda qol vuran Abubakar elə o mövsüm klub rəhbərliyinin “qara siyahısı”nda idi. Ümid edək ki, gəlməyəcək. Gəlsə də, kluba ağır maddi ziyan vurmaz, onunla uzunmüddətli müqavilə bağlanmaz. Yoxsa vay “Neftçi”nin halına…

MÜZƏFFƏR QULUZADƏ