Cari mövsümdə cəmi üç qol vuran “Neftçi” bu göstəricidə yalnız aşkar autsayder “Kəpəz”dən irəlidədi. 5 oyunda iki top buraxan bakılıların müdafiəsinin qaydasında olduğunu deyə bilərik. Belə görünür ki, Samir Abbasov çempionluq uğrunda mübarizəyə qatılmağın yolunu yüksək səviyyəli hücumçu transferində görür.
Son günlər Vensan Abubakarın mümkün transferi ilə bağlı xəbərlərə məhz bu kontekstdə baxmaq lazımdı. Bəli, “Neftçi” Kamerun yığmasının kapitanına ciddi maraq göstərir. Karyerası boyunca “Valensyenn”, “Loryan”, “Portu”, “Beşiktaş”, “Əl-Nəssr” və “Hatayspor” klublarında legioner həyatı yaşayan Vensanın növbəti dayanacağı Bakı ola bilər. Artıq Kamerun mediası “ağ-qaralar”ın ona ünvanladığı təklifin detallarını da açıqlayıb. "Neftçi" 33 yaşlı forvarda birillik müqavilə və 500 min avro maaş təklif edib. Hazırda tərəflər arasında danışıq gedir.
Abubakar bu mövsüm hələ klub səviyyəsində rəsmi matça çıxmayıb. Onun son klubu "Hatayspor" olub, bu ilin mayında Türkiyə təmsilçisindən ayrılıb. Vensanın DÇ-2014 və DÇ-2022-nin iştirakçısı olduğunu da xatırladaq.
ORXAN