Ötən mövsüm olduğu kimi, bu mövsüm də “Beşiktaş”da zədə problemi çox aktualdı.

Football-plus.az xəbər verir ki, ötən mövsüm komanda bir ara hətta ÇL matçında normal heyət qurmaqda çətinlik çəkirdi. Çünki eyni anda 12-13 futbolçu sıradan çıxmışdı. Bu mövsüm də bənzər vəziyyət yaranıb. Ən son “Trabzonspor”la qarşılaşmada Vut Veqhorst əzələsini dartdı. Düzdü, onun zədəsi o qədər də ciddi deyil. Niderlandlı futbolçu yalnız bir həftəliyə sıradan çıxıb. Amma maraq üçün bildirək ki, Veqhorst cari “futbol ili”ndə “Beşiktaş”da zədə problemi yaşayan ümumilikdə 13-cü futbolçu oldu. “Beşiktaş” növbəti oyununu bazar ertəsi səfərdə “Hatayspor”a qarşı keçirəcək. Türkiyə mətbuatının yazdığına inansaq, Veqhorst baş məşqçi Valerien İsmaelə həmin matçda oynamaq istədiyini bildirib. Amma klubun tibbi personalı bunun böyük bir risk olacağını qeyd edib. Ona görə də Hatay səfərində 30 yaşlı forvardın meydana çıxacağı gözlənilmir.

Bu isə “Beşiktaş”da sistemin dəyişməsinə səbəb ola bilər. Çünki Veqhorst hava toplarında çox effektlidi və onun meydanda olduğu anlarda komanda cinah asmalarından çox istifadə edirdi. “Qartal”ın digər forvardları Cekson Muleka ilə Cenk Tosun “ikinci mərtəbədə” Veqhorst qədər faydalı deyil. Bu üzdən “ağ-qaralar” qarşıdakı matçda hücumları göylə yox, yerlə qurmalı olacaq. Amma digər tərəfdən Muleka “Beşiktaş”a gəldiyi gündən bəri ilk dəfə öz doğma mövqeyində, yəni hücumun mərkəzində qərarlaşacaq. Konqolu futbolçu indiyə qədər oynadiği 8 qarşılaşmadan 6-da sol vinger, 2-də sağ vinger mövqeyində çıxış edib və 4 qol vurub. 23 yaşlı forvard ötən mövsümün 2-ci dövrəsində “Kasımpaşa”da məhz mərkəz hücumçusu qismində 13 qarşılaşmada 12 qol vuraraq diqqətləri üzərinə çəkmiş və yayda 3,35 milyon avroya “Beşiktaş”a transfer olunmuşdu. Veqhorstun yoxluğunda Cenk Tosunun da bu mövsüm ilk dəfə start heyətində peyda olacağı gözlənilir. Amma təcrübəli futbolçu vinger mövqeyində oynayacaq. Bu mövqe ona heç də yad deyil. O, daha öncə Şenol Günəşin dövründə cinahda Vinsent Abubakar ilə birlikdə komandaya çox fayda vermişdi. “Trabzonspor”la görüşdə komandasını məğlubiyyətdən xilas edərək bu mövsümdə ilk qolunu vuran Tosun ümumilikdə “Beşiktaş”da 155 rəsmi qarşılaşmada 68 qol, 14 məhsuldar ötürmə ilə fərqlənib.

Onu da bildirək ki, “Hatayspor”la oyunda Veqhorstdan başqa zədə üzündən Saiss, Gezzal, Hatçinson və Əmrəcan Uzunhan da meydana çıxa bilməyəcək. Veteran Hatçinson bu mövsüm, ümumiyyətlə, heç bir oyunda komandaya kömək edə bilməyib! Gezzal və Souza isə zədə üzündən 5 tur buraxıb.

ƏLİ