İsmael Bennaser klubunu dəyişib. “Milan” onu icarəyə verib.

Yarımmüdafiəçi karyerasını Zaqreb “Dinamo”sunda davam etdirəcək. Bu barədə Xorvatiya klubunun mətbuat xidməti məlumat yayıb. İtaliya nəhəngi futbolçunu icarəyə verib. 27 yaşlı əlcəzairli ilə müddəti 2025/26 mövsümünün sonuna qədər nəzərdə tutulan müqavilə imzalanıb. “Dinamo” Bennaseri birdəfəlik almaq hüququna da malikdi. Onun “Milan”la müqaviləsinin müddəti 2027-ci il iyunun sonuna kimidi.

Əlavə edək ki, Bennaser ötən mövsümün ikinci yarısında “Marsel”də icarə əsasında çıxış edib. Bu komandada keçirdiyi 12 matçda 2 məhsuldar ötürmə edib.

Yeri gəlmişkən, Yasin Adli də tezliklə “Milan”ı tərk edəcək. Rəhbərlik futbolçunu satmağa hazırlaşır. İnsayder Nikolo Skiranın məlumatına görə, 25 yaşlı yarımmüdafiəçi karyerasını Səudiyyə Ərəbistanında davam etdirəcək. Lakin onu transfer edəcək klubun adı açıqlanmayıb.

Adli 2021-ci ildən “Milan”ın formasını geyir. O, komandada 39 oyun keçirib, 1 qol vurub və 2 məhsuldar ötürmə edib.