“Milan”ı daha iki futbolçu tərk edib. Hər ikisi komandadan müvəqqəti ayrılıb.

"Football-plus.az" xəbər verir ki, “Nottingem Forest” hücum xəttini Divok Orici ilə gücləndirib. İngiltərə klubu “Milan”nın oyunçusunu icarəyə götürüb. Belçikalı forvard 2023/24 mövsümünü bu statusla “Nottingem Forest”də keçirəcək. Divok “Milan”a ötən ilin yayında “Liverpul”dan keçmişdi. 28 yaşlı hücumçu İtaliya klubunda meydana çıxdığı 36 matçda 2 qol vurub və 1 məhsuldar ötürmə verib.

Fode Ballo-Ture də “Milan”dan ayrılıb. O da icarəyə verilib. 26 yaşlı seneqallı müdafiəçi karyerasını “Fulhem”də davam etdirəcək. Fode ilə bağlanan müqavilənin müddəti mövsümün sonunadək nəzərdə tutulub. Sözləşməyə birdəfəlik satın ala bilmə ilə bağlı bənd nəzərdə tutulmayıb. “Milan” Ballo-Tureni 2021-ci ildə “Monako”dan transfer edib. O, ötən mövsüm A seriyasında 20 matçda meydana çıxıb və 1 qol vurub.