“Çelsi”ni bir çox futbolçular kimi Kristian Pulişiç də tərk edir. O, karyerasını “Milan”da davam etdirəcək.

İnsayder Fabritsio Romanonun məlumatına görə, ABŞ millisinin yarımmüdafiəçisi yeni klubunda tibbi müayinədən problemsiz keçəcəyi halda “Milan”a transferi rəsmən açıqlanacaq.

"Football-plus.az" xəbər verir ki, son mövsümdə “Çelsi”nin heyətində bütün yarışlarda 30 oyuna çıxan, bir qol vurub və iki məhsuldar ötürmə verən Pulişiçin London klubu ilə müqaviləsinin müddəti 2024-cü ilin yayına qədərdi. “Transfermarkt” portalında onun real dəyəri 25 milyon avro göstərilib. Hələ ki Kristianın İtaliya klubuna hansı məbləğə başa gələcəyi haqda rəsmi məlumat verilmir.

Yeri gəlmişkən, bir neçə ay əvvəl Paolo Maldini “Milan”ın futbol direktoru vəzifəsini tərk etmişdi. Artıq əfsanəvi futbolçunun oğlu da komandadan ayrılıb. “Empoli” gənc hücumçunu icarəyə götürüb. 21 yaşlı futbolçu 2023/24 mövsümünü icarə əsasında bu komandada keçirəcək.

“Empoli” növbəti mövsümün sonunda onu birdəfəlik almaq hüququna malikdi. Ötən mövsüm Daniel “Spetsiya”da da icarə əsasında çıxış etmiş və bu komandada 20 oyuna 3 qol vurmuşdu.