Həftəiçi Almaniya kubokunda birinci mərhələnin, yəni 1/32 finalın təxirə salınmış iki qarşılaşması keçirildi.

Xatırladaq ki, kubok matçları keçirildiyi həftədə “Bavariya” ilə “Ştutqart” Superkubokda üz-üzə gəldiyindən onların oyunları təxirə salınmışdı.

Avqustun 26-da “Ştutqart” 2-ci bundesliqa təmsilçisi Braunşveyq “Ayntraxt”ının qonağı oldu. “Qol yağışı”na səhnə olan matçda bu mərhələnin ən böyük sürprizi qeydə alına bilərdi. Belə ki, kubokun son qalibi statusunda olan şvabiyalılar 89-cu dəqiqəyə hesabda geridə daxil oldu! Amma əsas vaxt 3:3, 120 dəqiqəlik mübarizə 4:4 hesabı ilə yekunlaşdığından qalib penalti seriyasında müəyyənləşdi. Ümumilikdə 15 penaltinin vurulduğu seriyada isə “Ştutqart” sevindi.

Ertəsi “Bavariya” Visbadenə səfər etdi. Heç vaxt elitada oynamayan “Vehen” tarixində ilk dəfə “Bavariya” ilə qarşılaşırdı. Rəqibin 3-cü bundesliqa təmsilçisi olmasına baxmayaraq, Münhen nəhəngi oyuna heç də zəif heyətlə çıxmamışdı. Düzdü, “rekordmayster” son illərdə ölkə kubokunda fanatlarını sevindirmir. Amma komandanın birinci mərhələdəcə 3-cü liqa klubuna uduzması biabırçılıq olardı. Görüş Vensan Kompaninin komandası üçün heç də asan keçmədi. “Bavariya” Keyn və Olisenin qolları ilə iki topluq üstünlük yaxalayandan sonra vaxtından tez rahatlaşdı.

Meydan sahiblərinin heyətində səhnəyə çıxan futbolçu Fatih Kaya oldu. Ötən mövsüm 3-cü bundesliqada 20 qolla bombardir olan 26 yaşlı türkəsilli forvard 6 dəqiqə aralığında iki qol vurmaqla münhenli fanatları şoka saldı. Amma matçın ən yaxşı oyunçusu seçilən Kayanın bu qəhrəmanlığı işə yaramadı. Hələ ki bu mövsüm heç bir rəsmi oyunda meydanı qolsuz tərk etməyən Keyn əsas vaxta artırılan 4-cü dəqiqədə dublunu rəsmiləşdirərək komandasına qələbə qazandırdı. “Bavariya” ardıcıl 30-cu mövsümdə bu turnirdə birinci mərhələ səddini adlamağı bacardı.

Komandanın kubokda 1-ci mərhələdə uduzması sonuncu dəfə 1994/95 mövsümündə baş verib.

1/32 final
Vehen (D-3) – Bavariya 2:3
Fatih Kaya, 64; 70 – Keyn, 16-p.; 90+4. Olise, 51.
Bavariya: Urbiq, Boe (Laymer, 80), Ta, Kim Min Ce, Gerreyro, Kimmix, Pavloviç (Qoretska, 67), Olise, Karl (Qnabri, 67), Dias, Keyn.

Ayntraxt B (D-2) – Ştutqart 4:4, p. - 7:8
Köler, 7. Di Miçele, 77; 88. Konte, 104 – Demiroviç, 11; 60. Voltemade, 89. Ba, 92.
Ştutqart: Nübel, Assinyon, Yeltş (Zaqadu, 115), Hendriks, Mittelştadt, Karazor, Ştiller (Çema, 86), Tomas (Vaqnoman, 96), Dəniz Undav (Voltemade, 71), Fürix (Levelinq, 71), Demiroviç.