Almaniya kubokunda 1-ci mərhələyə, yəni 1/32 finala yekun vuruldu.

"Football-plus.az" xəbər verir ki, əslində bu mərhələnin digər oyunları avqustun 11-14-də keçirilmişdi. Sadəcə, həmin vaxt “Bavariya” ilə “Leyptsiq” superkubokda qarşılaşdığından bu komandaların oyunu təxirə salınmışdı. Münhen nəhəngi, gözlənildiyi kimi, 3-cü bundesliqa təmsilçisi “Proyssen Münster”lə oyunda ciddi problem yaşamadı. Baş məşqçi Tomas Tuxel heç Harri Keynə də ehtiyac duymadı. İngiltərə yığmasının kapitanı bütün oyunu ehtiyat oyunçular skamyasında keçirdi. Bu komandalar daha öncə yalnız bir dəfə qarşılaşmışdılar. Həmin oyun 2014/15-də yenə də Almaniya kubokunun 1-ci mərhələsinə təsadüf etmiş və “rekordmayster” 4:1 hesabıyla üstün olmuşdu. Budəfəki qarşılaşmada Münhen nəhəngi artıq ilk yarıda 3 qol vurmaqla bütün suallara aydınlıq gətirdi. 3 qoldan ikisini hesabına Laymerlə Kretsiq yazdı. “Leyptsiq”dən transfer olunan universal Laymer yeni klubunda ilk qolunu vurdu. “Bavariya”nın öz yetirməsi olan 20 yaşlı yarımmüdafiəçi Kretsiq də əsas komandada ilk qolunu vurdu. Bu futbolçu qolundan zədə alaraq erkən əvəzlənməli olan Qnabrinin əvəzinə meydana çıxmışdı. Qnabridən söz düşmüşkən, müayinədən sonra ondan üzücü xəbər gəldi. Təcrübəli vingerin sol qolunun qırıldığı məlum oldu. Dünən əməliyyat olunan 28 yaşlı futbolçu bir neçə həftəliyə sıradan çıxıb. Yekun nəticəni isə gənc fransalı forvard Tel müəyyənləşdirdi. Ötən yay “Renn”dən transfer olunan 18 yaşlı futbolçu “Bavariya”da 36-cı rəsmi oyunda 11-ci qolunu vurdu. Xatırladaq ki, bu kuboku hamıdan çox – 20 dəfə qazanan “Bavariya” son üç mövsümdə heç yarımfinala da yüksələ bilməyib! Ona görə də komandanın bu mövsüm bu turnirə daha ciddi yanaşacağı gözlənilir. Dünən keçirilən qarşılaşmada da “Leyptsiq” adını növbəti mərhələyə yazdırdı.

1/32 final
Proyssen Münster (D-3) – Bavariya 0:4
Çupo-Motinq, 8. Laymer, 39. Kretsiq, 45+5. Tel, 86.
Bavariya: Perets, Laymer (Sarr, 63), Mazraui, Qoretska, Devis (Gerreyro, 63), Kimmich (Fukui, 63), Qnabri (Kretsiq, 11), Çupo-Motinq (Sané, 82), Musiala, Koman, Tel.
Vehen (D-2) – Leyptsiq 2:3
Prtayin, 41; 73 – Forsberq, 7. Şeşko, 18; 70.