Almaniya kubokunda bu həftə finalçılar bəlli oldu.

"Football-plus.az" xəbər verir ki, ilk oyun günündə bu mövsümün əsas sürprizi sayılan 3-cü bundesliqa təmsilçisi “Saarbrükken” 2-ci bundesliqa təmsilçisi “Kayzerslautern”i qəbul etdi. Çoxları “Saarbrükken” nağılının davam edəcəyini düşünürdü. Çünki bu klub 1/16 finalda “Bavariya”nı, 1/8 finalda Frankfurt “Ayntraxt”ını, ötən mərhələdə isə Münhenqladbax “Borussiya”sını mübarizədən kənarlaşdırmışdı. Amma elita təmsilçilərinə qan udduran kollektiv 2-ci bundesliqanın autsayderi ilə bacara bilmədi! Görüşdə həlledici qollar ikinci hissədə vuruldu. Ritter və Turenin qolları “Kayzerslautern”ə inamlı qələbə qazandırdı. Kubokun ikiqat qalibi olan bu komanda XXI əsrdə 2-ci, tarixində 8-ci dəfə kubokun finalına yüksəldi. “Kayzerslautern” sonuncu dəfə finalda 21 il öncə - 2003-cü ildə oynamış və “Bavariya”ya 1:3 hesabı ilə boyun əymişdi. “Kayzerslautern” həm də 2-ci bundesliqanın son 13 ildə finala yüksələn ilk təmsilçisi oldu. Sonuncu dəfə bunu 2011-də “Duysburq” bacarmışdı. Həmin vaxt bu komanda həlledici görüşdə “Şalke-04”ə 5 cavabsız qolla məğlub olmuşdu. “Saarbrükken” son 5 mövsümdə ikinci dəfə mübarizəni yarımfinalda dayandırmalı oldu. 2019/20-də bu komanda finalın biraddımlığında “Bayer-04”ə boyun əymişdi.

Bayer-04 – Fortuna (D-2) 4:0
Frimponq, 7. Adli, 20. Virts, 35; 60-p.
Saarbrükken (D-3) – Kayzerslautern (D-2) 0:2
Ritter, 53. Ture, 75.