Almaniyada superkubok uğrunda qarşılaşma keçirildi.

Ötən mövsüm kuboku qazanmış “Ştutqart” doğma fanatları önündə son çempion “Bavariya”nı qəbul etdi. Ötən yay superkubokda penalti seriyasında “Bayer-04”ə uduzan şvabiyalılar bu dəfə fanatları sevindirmək arzusundaydılar. Özü də bu, “Bavariya”nın fəxri prezidenti Uli Hönessin qohumu Sebastyan Hönessin “Ştutqart”ın başında yubiley – 100-cü rəsmi oyunu idi. Ancaq bütün bu məqamlara və yerli fanatların stadionda gözəl ab-hava yaratmasına baxmayaraq, “Ştutqart” qarşıya qoyulan hədəfə çata bilmədi.

Qələbənin əsasını ilk yarıda Keyn qoydu. Münhen nəhənginin yeni transferi Dias ilk rəsmi matçında fərqlənərək komandasının ikinci qolunu vurdu. Kolumbiyalı ulduzun bu qolu bir müddət öncə faciəvi şəkildə dünyasını dəyişən sabiq komanda yoldaşı Jotaya həsr etməsi diqqətdən qaçmadı. “Ştutqart” son anlarda Almaniya yığmasının üzvü Levelinqlə fərqi minimuma endirsə də, məğlubiyyətdən qurtula bilmədi.

Beləliklə, “Ştutqart” ardıcıl ikinci dəfə mövsümə superkubokda uduzmaqla start verdi. Ancaq bu klub bu titulu bir dəfə - 1992-ci ildə qazanmağa müvəffəq olub. “Bavariya” isə son 10 ildə 7-ci, tarixində 11-ci dəfə superkuboka sahib çıxdı. Bundesliqanın qalibi olmaqla karyerasının ilk titulunu qazanan Keyn kolleksiyasını zənginləşdirərək ikinci titulu da hesabına yazdı.

Ştutqart – Bavariya 1:2
Levelinq, 90+3 – Keyn, 18. Dias, 77.
Ştutqart: Bredlov, Vaqnoman (Assinyon, 81), Jak, Şabo (Hendriks, 71), Mittelştadt, Ştiller (Andres, 87), Karazor (Narti, 81), Levelinq, Dəniz Undav, Fürix (Demiroviç, 71), Voltemade.
Bavariya: Noyer, Laymer (Boe, 72), Upamekano (Kim Min Ce, 80), Ta, Stanişiç, Kimmix, Qoretska (Bişof, 90+3), Qnabri (Gerreyro, 80), Olise (Karl, 90+3), Dias, Keyn.