Liqa 1-in son mövsümündə çempionluq uğrunda mübarizə yaşanmadı. Ancaq belə görünür ki, Fransa futbolunun bütün həvəskarları buna öyrəşib.

"Football-plus.az" xəbər verir ki, tarixində ilk dəfə ÇL-i qazanan PSJ daxili arenada da rəqib tanımır. Paytaxt klubu artıq ölkənin 13 qat çempionudu. Özü də hər şey bu seriyanın davam edəcəyindən xəbər verir. Parislilər artıq sona 6 tur qalmış çempionluğu qazanaraq, sakitcə ölkə kubokunun finalına hazırlaşmağa və ÇL zəfərinə doğru yürüməyə başladı.

Çempionluq intriqası öz yerində, ancaq son ana qədər avrokuboklara vəsiqə uğrunda amansız mübarizə getdi. Üç turnirin hər biri ilə bağlı. PSJ-nin ardından “Marsel” də ÇL-ə vəsiqəni təmin etdi. Cənubluların baş məşqçisi Roberto De Zerbi demarşlar təşkil etdi, komanda, hakimlər korpusu ilə münaqişəyə girdi, istefanın astanasında dayandı. Hərçənd belə əsəbiliyi anlamaq olar: “Marsel” bir ara “Avropa Liqası zonası”nda var-gəl edirdi. Baxmayaraq ki, cənublular adlara və heyətin potensialına görə PSJ-yə çox ciddi şəkildə uduzmurdu. Hər halda, komanda sonda “Monako”nu 4 xal qabaqlamaqla ÇL hədəfinə çatdı.

“Knyazlar” 2-ci yer uğrunda sona qədər mübarizə aparsa da, bəzi amillər “Marsel”in xeyrinə idi. Avrokuboklarda olmayan cənublular artıq yanvarın ortalarında ölkə kubokundan da çəkildi. Bununla belə, “Monako”nu bu rəqabətdə geri salan əsas səbəb son turlardakı acınacaqlı nəticələrdi. “Knyazlar” son 5 turun üçündə xal itirdi: “Strasbur” və “Havr” ilə heç-heçələr, “Lans”dan alınan acı məğlubiyyət (0:4) “Marsel”in “çörəyinin üstünə yağ sürtdü”.

ÇL qatarının sonuncu vaqonuna isə “Nitsa” sıçradı. Düzdü, “Monako”dan yalnız 1 xal geri qalan “qartallar” mübarizəyə təsnifat mərhələsindən başlayacaq. Vəziyyətin daha aydın olması üçün onu da xatırladaq ki, “Nitsa” “Lill”i yalnız əlavə göstəricilərə görə qabaqladı. “Qartallar” mövsümün müəyyən bölümündə hətta 2-ci yerə də əsas namizəd sayılırdı. Sadəcə, 25-29-cu turlar aralığında təsadüf edən 5 qələbəsiz oyun “Nitsa”nı mükafatçı yerlərdən uzaq saldı.

Əslində avrokubların istənilən birində iştirak komandalar üçün böyük uğur və tərəqqi sayılır. Ancaq Liqa 1-də ÇL-ə düşənlərdən başqa, demək olar ki, hər kəs məyusdu. Ona görə ki, qitənin əsas klub turnirinə vəsiqə çox yaxında idi. Xüsusən də əlavə göstəricilər (qolların nisbəti) baxımından “Nitsa”dan geri qalan, AL-də oynayacaq “Lill” alışıb-yanır. “Lill”in mövsümün gedişində hansısa böhran yaşadığını demək olmaz. “Şimallı itlər” mövsümün ilk yarısında hətta 14 oyunluq məğlubiyyətsiz seriyaya malik idi. Ancaq problem budu ki, həmin seriyada çoxlu heç-heçə qeydə alınmışdı. İndi klubda çatışmayan 1 xala görə yananlar çoxdu.

“Lion” isə mövsüm boyunca inzibati və maliyyə problemləri fonunda silkələndi. “Şirlər” müəyyən anlarda ÇL-ə vəsiqəyə də yaxın idi. Onlar elə həmin “Nitsa”dan yalnız 3 xal geri qaldı. Əslində hər şey “Lion”un öz əlində idi. Amma bu komanda son 5 turun üçündə uduzmaqla işləri korladı. Problemlər mövzusuna dönsək, yeni sahib Con Tekstor klubun imicinə zərbə vurur. O, Pyer Sajı gözlənilmədən baş məşqçi postundan istefaya göndərdiyinə görə də azarkeşlərin qəzəbinə tuş gəldi. Tekstor Sajın postunu imici birmənalı olmayan Paulo Fonsekaya tapşırdı. Sonradan portuqaliyalı mütəxəssis də hakimə hücuma görə uzunmüddətli diskvalifikasiya aldı.

Ancaq mövsümün sonluğunu ən böyük məyusluğu “Strasbur”la bağlıdı. Sona üç tur qalmış hətta ÇL-ə vəsiqəyə iddialı olan komandanın 12 oyunluq məğlubiyyətsiz seriyası var idi. Görünür, son anda məhz təcrübə çatmadı. “Strasbur” 33-cü turda xala ehtiyacı olmayan “Anje”yə, 34-cü turda isə aşkar autsayder “Havr”a uduzdu. Beləliklə, ÇL-ə vəsiqənin astanasında olan komanda sonda KL-ə vəsiqə ilə kifayətləndi.

Fransada çox tez-tez əsas autsayder erkən müəyyənləşir və sona qədər də “yerindən tərpənmir”. Son mövsümdə də belə oldu. Söhbət “Monpelye”dən gedir. Baxmayaraq ki, mövsüm başlamamış heç nə faciədən xəbər vermirdi. Ancaq uğursuz məşqçi dəyişiklikləri, kollektivdəki pis mənəvi ab-hava uğursuzluğu şərtləndirdi. Nəticə isə o oldu ki, “Monpelye” 15 oyunluq qələbəsiz və 11 oyunluq məğlubiyyət seriyası yaxaladı. Bundan sonra elitada qalacağına ümid etməyə dəyməzdi.

17-ci yer isə tez-tez “əl dəyişdi”. Ancaq elitanın debütantı olan “Sent-Etyen” bu mövqedə daha çox dayandı. Fransanın onqat çempionu sonda elitada yerini qoruya bilmədi. Bəxtsizliyə, yaşadığı drama görə “Strasbur”la müqayisə oluna biləcək əsas komanda isə “Reyms”di. Bir ara hətta avrokuboklara vəsiqəyə boylanan “Reyms” son turlarda hədsiz zəif təsir bağışlamaqla (son 4 oyunda 1 xal) yanaşı, “Havr”, “Anje” və ya “Nant” kimi autsayderlərin yüksəlişini də izləməli oldu. Amma bu da son deyildi. Pley-offda, adətən, elita təmsilçisi qələbə qazanır və burdakı yerini qoruyur. Liqa 2-də 3-cü yer tutan “Mets”lə qarşılaşan “Reyms”dən azarkeşləri məhz bu qəhrəmanlığı gözləyirdi. Həm də ölkə kubokunun finalına qədər irəliləyən “Reyms”in “Mets”kə dueldə favorit sayılması təbii idi. Pley-off səfərdən heç-heçə (1:1) ilə dönən “Reyms” üçün yaxşı başladı. Elita təmsilçisi evdə keçirdiyi cavab oyununda hesabı açsa da, “Mets” bərabərlik qolunu vurmağa bacardı. Əlavə vaxtda Liqa 2 təmsilçisi daha iki dəfə fərqlənməklə azarkeşlərini sevincə qərq etdi.