Adətən, çempionlar haqda pis heç nə demirlər. Ancaq PSJ təzadlı komandadı. Fransa daxilində qazanılan titullar artıq heç kimi maraqlandırmır. Hər kəs Çempionlar Liqasında uğura köklənib. Ancaq Kristof Qaltye də bunu bacarmadı.

"Football-plus.az" xəbər verir ki, artıq istefaya göndərilən baş məşqçi mövsüm boyunca çalışdı ki, komanda mexanizm kimi çalışsın, futbolçular ehtirasla hədəflərə çatmaq uğrunda mübarizə aparsın. Parislilər ÇL-in 1/8 finalında “Bavariya”ya uduzub mübarizəni dayandırandan sonra klub bossları düşündülər ki, baş məşqçini qovmağa ehtiyac yoxdu. Hərçənd PSJ-ni bu heyətlə adi bədən tərbiyəsi müəllimi də çempion edə bilərdi. Komanda son nəticədə tarixində 11-ci dəfə çempion ola bildi. 1-ci yerlə 2-ci yer arasındakı xal fərqi isə cəmi 1-ə bərabər oldu. Sonra kimsə düşünəcək ki, çempionluq yarışında hansısa intriqa olub. Əslində PSJ çempionluğu təmin edəndən sonra “Lans”a bu qədər yaxınlaşmaq imkanı yaratdı.

Parislilərin daxili arenada da böyük problemlərlə üzləşdiyi bölümlər oldu. Düzdü, əvvəlki mövsümlərdə başqa məşqçilərlə də belə problem yaşanırdı. Ancaq onda söhbət çempionatdakı rəqiblərin qiymətləndirilməməsindən gedirdi. Bu dəfə isə PSJ həqiqətən də bəzi oyunlarda rəqiblərinə məhz futbol komponentləri baxımından uduzurdu, psixoloji baxımdan yox. Mbappeyə Liqa 1-də oynamaq artıq mənasız görünür, Neymar zədə üzündən hədsiz tez sıradan çıxdı, Messi ilə Verratti isə mövsümün 2-ci bölümünü yola verdilər. Bu, qətərli sahiblərin dövründə ən pis PSJ-di. Bununla belə, həm də çempiondu.

Liqa 1-in son mövsümünün sevindirici məqamlarından biri ÇL-ə qalan vəsiqələr uğrunda amansız mübarizənin getməsidi. Özü də 2-ci və 3-cü yeri tutmaq arasında prinisipial fərq var idi. 2-ci yer birbaşa qrupa vəsiqə qazandırırsa, 3-cü yeri tutan təsnifat mərhələsini adlamalıdı ki, bu da asan deyil. Bu üzdən iddialı klubların əksəri gözünü 2-ci pilləyə dikmişdi. Bu məsələdə sabitlik həlledici rol oynadı. “Lans”, “Loryan”, “Marsel”, “Monako” və “Loryan” bu yerə iddiasını gizlətmirdi. “Loryan” nağılı qış “transfer pəncərəsi”ndə - Moffi ilə Uattara kimi ulduzlar gedəndə bitdi. Tədricən “Loryan” da gerilədi və mövsümün ilk yarısında topladığı xal ehtiyatı sayəsində 10-cu oldu. “Lans” isə inadkarlıq göstərdi. Mövsümün müəyyən məqamlarında “qan-qırmızılar”ı “Monako” və “Renn” arxada qoydu, “Marsel” də təzyiqini davam etdirdi. “Lans” mövsümün finişini fantastik keçirdi. Komanda son 12 oyunun 11-də qələbə qazandı ki, belədə “Marsel”in, sadəcə, əllərini yanına salmaqdan başqa çarəsi qalmadı.

Frank Hayz tam haqlı şəkildə mövsümün ən yaxşı məşqçisi sayıldı. “Lans” gözəl təşkil olunmuş komandadı, ulduzları yoxdu, amma balanslaşmış heyətə malikdi, işə savadlı yanaşma və köklənmə nəticə verən hücum futbolunu şərtləndirir.

“Marsel” isə ÇL-də mübarizəyə təsnifatdan başlayacaq və bu mərhələni keçmək potensialı var. Həm yetərincə təcrübəlidi, həm də heyətdə ulduzlar var. Cənublular oyuna lazımi şəkildə köklənəndə parlaq təsir bağışlamağı bacarırlar.

Fransanın Avropa Liqasındakı təmsilçiliyi də maraqlıdı. Məsələn, “Renn”ə ÇL-ə vəsiqə qazanmaq üçün yalnız sabitlik çatmadı. Komanda yalnız mövsümün sonuna yaxın toparlandı ki, bu da 4-cü yeri tutmağa imkan verdi. Son 4 turda 4 qələbə Bruno Jenezionun yetirmələrini hədəfə çatdırdı.

“Renn” son mövsümdə iddialı oyunla yadda qaldı, hücumda parlaq ifaçılar var, bununla belə, istənilən futbolçudan təhlükə gözləmək olar. Mövsümün müəyyən məqamlarında gah bu, gah da digər futbolçu məsuliyyəti boynuna götürürdü. Fransanın AL-dəki digər təmsilçisi mövsümü, ümumiyyətlə, 13-cü yerdə bitirib. Ancaq onun avrokuboklardakı startını səbirsizliklə gözləmək olar. Ona görə ki, “Tuluza” Avropanın ən maraqlı komandalarından biridi. Söhbət komandanın maraqlı oyun göstərməsindən gedir. Pressinq, yüksək intensivlik, ağlasığmaz zərbələr və qollar. “Tuluza” ölkə kubokunun finalında “Nant”ın külünü göyə sovurdu və tarixə düşdü. Axı indiyə qədər bu komanda titul qazanmamışdı.

“Renn”dən cəmi 1 xal geri qalan “Lill” Fransanı Konfrans Liqasında təmsil edəcək. Hər halda, mövsümün əsas uğursuzlarına – “Monako” ilə “Lion”a baxanda bu da bir nəticədi. “Knyazlar” mövsümün sonluğunu inanılmaz şəkildə boşa verdi. “Lion”, “Renn” və “Tuluza” ilə oyunlarda qeydə alınan ardıcıl üç məğlubiyyət “avrokubok zonası”ndan kənarda qalmaqla nəticələnməliydi ki, elə nəticələndi də. “Lion”a gəlincə, “şirlər” mövsüm boyunca 10-cu yer zonasında var-gəl etdilər. Komanda gah hamını təəccübləndirən dərəcədə parlaq oyun göstərir, gah da adi bir rəqiblə qarşılaşmada fiasko yaşayırdı. Sonda 7-ci yer tam məntiqli nəticədi.

Bildiyiniz kimi, Fransada elitada 20 komandanın olmasına ehtiyac duyulmadı və artıq iştirakçı sayı 18-ə endirilib. Bu üzdən Liqa 1-dən 4 komanda ayrılmalı, onları aşağı dəstədən ikisi əvəz etməliydi. Məhz bu məqam son tura qədər elitada qalmaq uğrunda amansız mübarizənin getməsini şərtləndirdi.

Əvvəlcə “Anje” büdrədi. Bu komanda erkən sonuncu yeri “təminat altına aldı” və rəqiblərdən çox geri düşdü. Qalan üç arzuolunmaz vəsiqəyə isə 6 komanda “iddialı idi”. Mövsüm sona yaxınlaşanda “Strasbur”la “Brest” yaxşı nəticələri sıralayıb “təhlükəli zona”dan uzaqlaşdı. Eyni zamanda “Ayaçço” ilə “Trua” “əyləci basaraq” “Anje” ilə tale yoldaşı oldular. Mövsümün sonunda bütün intriqa “Nant”la “Oser”in taleyi ətrafında cərəyan edirdi. Fransa kubokunun finalına qədər irəliləyən “bülbüllər” ötənilki möcüzəni təkrarlaya bilməyərək “Tuluza”ya uduzdular. Və bu məğlubiyyət onları hövsələdən çıxardı. Həqiqət anı 38-ci turda yetişdi. “Nant” ümidsiz “Anje” üzərində qələbə qazandısa, “Oser” turnir vəzifəsinin öhdəsindən gələn, amma rəqibə kömək etmək istəməyən prinsipial “Lans”a uduzdu. Beləliklə, aşağı dəstəyə “Oser”, “Ayaçço”, “Trua” və “Anje” yollandı.