Türkiyə kubokunun finalında ''Qalatasaray'' ''Trabzonspor''u 3 cavabsız qolla üstələdi.

Bu zəfər tək ''sarı-qırmızılar''a sevinc yaşatmadı. Eyni zamanda avrokuboklara vəsiqə uğrunda mübarizəyə də ciddi təsir göstərdi. ''Qalatasaray'' onsuz da Türkiyə çempionatında ilk iki pilləni rəsmiləşdirməklə ən azı Çempionlar Liqasının təsnifat mərhələsinə vəsiqəni özü üçün təmin etmişdi. Bu tərəfdən komanda ölkə kubokunu da qazandı. Bu da o deməkdi ki, superliqada mövsümü hətta 5-ci pillədə bitirən kollektiv də avrokuboklara vəsiqə qazanacaq!

Daha dəqiq desək, 2-ci pillənin sahibi mübarizəyə ÇL-in 2-ci təsnifat mərhələsindən, 3-cü pilləni sahibi AL-in pley-offundan başlayacaq. Həmin komanda pley-offda uduzsa, birbaşa Konfrans Liqasının əsas mərhələsinə düşəcək. 4-cü pillənin sahibi AL-in 2-ci təsnifat mərhələsində, 5-ci pillənin sahibi isə KL-in 2-ci təsnifat mərhələsində oynamağa haqq qazanacaq. Finalda uduzmaqla ''Trabzonspor'' gələn mövsüm avrokuboklarda oynamaq şansını bir xeyli çətinə saldı. Çünki qaradənizlilər artıq mütləq ən azı ilk ''5-liy''ə düşməlidi. Komandanı hazırda 5-ci pillədən 5 xal ayırır.

Belə görünür, sona qədər də 5-ci pillə uğrunda bir neçə komanda arasında gərgin mübarizə gedəcək. Çünki hazırda 5-ci pillə ilə 10-cu pillə arasında cəmi 5 xallıq fərq var.