Avropa, xüsusən də Fransa futbolunun tarixi ilə maraqlananlar “Sent-Etyen”in adını eşitməmiş olmaz.

Yeni nəsil “Sent-Etyen”i Fransanın ortabab, son illərdə elitada qalmaq uğrunda oynayan klubu kimi tanıyır. Ancaq heç şübhəsiz, 10 dəfə ölkə çempionu olan, 6 dəfə ölkə, 1 dəfə Liqa kubokunu qazanan klub kimi tanıyanlar da var. Zəngin tarixə malik “yaşıllar”ın son illərdəki durumu haqda danışmağa dəyməz. Yumşaq desək, inamsız oynayırlar.

Son illərin “Sent-Etyen”ini belə xarakterizə etmək olar: Liqa 1-də ortabab və ya yerini qorumaq uğrunda oynayan komanda. “Yaşıllar” avrokuboklarda da oynayıblar, 2010-cu illərdə hətta iki dəfə Avropa Liqasında 1/16 finala qədər irəliləyiblər, ancaq bundan artığına gücləri çatmayıb.

Liqa 1-də keçən son illərə baxaq. 2019/20 mövsümünə (yeri gəlmişkən, Fransada həmin mövsüm vaxtından əvvəl bitdi) qədər “Sent-Etyen”i elitanı tərk etməyə namizəd kimi göstərmək olmazdı. “Yaşıllar” hətta 4-cü (2018/19 mövsümü) və 5-ci (2014/15) yerə də sıçraya bilərdi, ancaq əsasən 7-9-cu yerlərdə var-gəl edirdilər. 2019/20 mövsümündə komanda artıq 17-ci pilləyə endi və elitadan getmək təhlükəsi ilə üzləşdi, ancaq koronavirus üzündən mövsüm bitmədi, onda elitadan “Tuluza” ilə “Amyen” getdi. “Yaşıllar” 2020/21 mövsümünü 11-ci yerdə, pley-off oyunlarından 6 xal irəlidə bitirdi, növbəti mövsüm isə faciə baş verdi. Sonuncu – faciəvi mövsümdə 18-ci yeri tutan “Sent-Etyen” elitada yerini qorumaq üçün “Oser”lə pley-off oyunları keçirməli oldu. Və dramatik dueldə məğlub olmaqla 2003/04 mövsümündən bəri ilk dəfə elitanı tərk etdi. Fanatların qəzəbini təsəvvər edə bilərsiz...

“Bir halda ki getmişik, deməli, həm də qayıtmalıyıq” – cari mövsümün startı ərəfəsində futbolçular və klub direktoru birağızdan belə deyirdilər. Mövsüm başladı və 4 oyundan sonra 20-ci yer... “Sent-Etyen” “Havr”a 0:6 uduzmaqla klub tarixində evdə ən böyükhesablı məğlubiyyətlə üzlışib. İndi futbolçular və fanatlar olduqca pis əhval-ruhiyyədədi, onlara bıçaq vursan, qan çıxmaz. Ədalət naminə qeyd edək ki, “Havr”la oyunda “Sent-Etyen”in üç (!) futbolçusu meydandan qovuldu.

Belə templə aşağı dəstədən də getmək olar, elitaya qayıtmağı isə birdəfəlik unutmaq lazımdı. İrəlidə mövsümün əsas hissəsi durur, ancaq “yaşıllar” bu il, çətin ki, elitaya dönə. Necə deyərlər, kiminin əvvəli, kiminin axırı. Onqat çempionluq hara, aşağı dəstədə autsayder olmaq hara?!