“Mançester Siti” ilə “Liverpul” çempionluğun taleyini müəyyənləşdirmək baxımından həlledici oyundan 2:2 hesablı heç-heçə ilə ayrıldı.

Elə 1-ci dövrədə də eyni hesab qeydə alınmışdı. Qvardiola ilə Kloppun komandaları arasındakı 1 xal fərqi qorundu. Əslində heç-heçə neytral azarkeşlər üçün ən arzulanan nəticədi. Axı belədə zirvədə ciddi xal fərqi yaranmadı, çempionluq intriqası hələ də yüksəkdi. Hazırda premyer-liqanın turnir cədvəlinin ön hissəsində belə vəziyyət yaranıb:

1. Mançester Siti 31 23 5 3 72-20 74
2. Liverpul 31 22 7 2 79-22 73
3. Çelsi 30 18 8 4 64-23 62

2018/19 mövsümündə də “Siti” ilə “Liverpul” arasında oxşar çempionluq yarışı gedirdi. Onda 31 oyundan sonra göstəricilər indiki mənzərəni xatırladırdı. Kloppun komandası 76, Pepin komandası 77 xal toplamışdı. İntriqa son tura qədər qorundu. Belə görünür ki, bu il də bizi sona qədər gərgin mübarizə gözləyir.

Bəs təqvim nə göstərir? “Mançester Siti”nin təqvimi daha asandı – “top-6” komandaları ilə oyunları qalmayıb. “Liverpul” isə hələ “Mançester Yunayted” və “Tottenhem” ilə görüşməlidi. Üstəlik elitada qalmaq uğrunda oynayan “Everton”la da prinsipial duel var.

Digər tərəfdən “şəhərlilər” bu mövsüm avrokuboklara vəsiqə uğrunda mübarizə aparan “Vest Hem”in qonağı olmalıdı. Son turda isə “Etihad”a Stiven Cerrardın “Aston Villa”sı gələcək. Çempionluq yarışı həmin ana qədər davam etsə, əla süjet alınacaq.

MS-nin təqvimi
17 aprel Vulverhempton* səfər
20 aprel Brayton ev
23 aprel Uotford ev
30 aprel Lids səfər
8 may Nyukasl ev
15 may Vest Hem səfər
22 may Aston Villa ev
* - bu oyun təxirə salınıb və nə vaxt keçiriləcəyi hələ açıqlanmayıb.
“Liverpul”un təqvimi
19 aprel Mançester Yunayted ev
24 aprel Everton ev
30 aprel Nyukasl səfər
7 may Tottenhem ev
10 may Aston Villa səfər
15 may Sauthempton səfər
22 may Vulverhempton ev

“Liverpul”la MS-nin yolları çempionluqla yanaşı, daha iki turnirdə kəsişə bilər. Komandalar hər biri irəliləyə biləcəyi halda, Çempionlar Liqasının finalında qarşılaşacaqlar. Aprelin 16-da isə bu komandalar ölkə kubokunun “Uembli”də keçiriləcək yarımfinal oyununda üz-üzə gələcəklər.

Və daha bir məqam: premyer-liqa çərçivəsində “Liverpul”la MS arasında daha bir duelin mümkünlüyü ilə bağlı kiçik də olsa, ehtimal qalır. Premyer-liqada komandaların yeri əvvəlcə xal hesabına görə müəyyənləşir. Bu göstəricidə bərabərlik olarsa, əlavə meyarlar işə düşür: ilk növbədə top fərqinə (“Liverpul”da +57, “Siti”də +52), sonra qol sayına (“Liverpul”da 79, “Siti”də 72) baxılır. Ardından şəxsi oyunlar var ki, yuxarıda artıq iki heç-heçənin qeydə alındığını vurğuladıq. Yəni mövsümün sonunda bütün göstəricilərdə bərabərlik olarsa, onda bizi “qızıl oyun” gözləyəcək. Bir sözlə, MS – “Liverpul” rəqabəti bitməyib.