Klublarımızın avrokubok macərası davam edir.

Əlbəttə, onların hər biri diqqət mərkəzindədi. Amma digər təmsilçilərimiz inciməyəcəksə, “Qarabağ”la bağlı bir qədər üzgörənlik etməyə dəyər. Ona görə ki, ən mötəbər klub turnirində çıxışa uğurla başlayan “köhlən atlar”ı bu yarışın əsas mərhələsində görmək eşqiylə alışıb-yanırıq, ağdamlıların həmin xoşbəxtliyi bizə yaşada bilmək üçün son ana qədər mübarizədən qopmayacağına inanırıq.

İndi 3-cü təsnifat mərhələsinə vəsiqə qazanmaq vaxtıdı. Düzdü, ağdamlılar İrlandiyada qazandığı böyükhesablı qələbəylə nəinki bizi, rəqibi belə məhz “Qarabağ”ın növbəti mərhələyə vəsiqə qazanacağına inandırıb. Ancaq, necə deyərlər, top yumru, meydan düzdü, sürprizlərlə zəngin futbol arxayınlığı sevmir! Belədə cavab matçına da böyük məsuliyyətlə yanaşmaq lazımdı. Bu məsələ komandanın, “Qarabağ”ı tribunalardan dəstəkləmək isə azarkeşlərin ixtiyarındadı. O ki qaldı stadiona gələ bilməyənlərə. Belələri matçı “CBC Sport”un efirindən canlı izləyə biləcək.

Çempionlar Liqası
2-ci təsnifat mərhələsi, cavab oyunu
Qarabağ – Şelburn (İrlandiya) 1:0
Con Martin, 44-öz qapısına.
Hakimlər: ANDREA KOLOMBO, Stefano Alassio, Dario Çeççoni, Kevin Bonaçina (hamısı İtaliya).
VAR hakimi: Daniele Doveri (İtaliya).
VAR hakiminin köməkçisi: Daniele Paterna (İtaliya).
30 iyul. Bakı. Tofiq Bəhramov adına Repsublika stadionu. Saat 20.00.
İlk oyun – 3:0.

Etiraf edək ki, “Qarabağ”ın ilk oyunda qazandığı qələbə sürpriz sayılmadı. Səviyyə fərqi də sözünü dedi, təcrübə də. “Köhlən atlar” rəqibi, demək olar ki, bütün komponentlərdə, xüsusilə, hücum xəttində üstələdi. Ağdam təmsilçisinin ev oyununda daha iddialı ola biləcəyini, onminlərlə azarkeşin dəstəyiylə inamına inam qatacağını nəzərə alsaq, cavab matçında da qələbə qazanmaq çətin olmayacaq. Və bu, sadəcə, bizim proqnozumuz deyil. Xəbər verdiyimiz kimi, “Şelburn” camiəsi, eləcə də irlandiyalı futbol mütəxəssisləri və media nümayəndələri də bizimlə həmfikirdi. Hətta Avropa Liqasıyla bağlı plan cızmağa başlayanalar da var. Odu ki, “köhlən atlar”ın taleyi ilə bağlı ciddi narahatlıq yaşamaq üçün hansısa əsas yoxdu.

Bununla belə, heyətdə iki zədəli var: Dani Bolt və Marko Yankoviç... Bolt İrlandiyadakı matçda dizindən zədə aldığına görə azı iki həftə müalicə olunacaq. Hələ oyundan əvvəl Bakıda keçirilən son məşqdə zədələnən, bu üzdən ilk görüşü buraxan Yankoviç bu dəfə də komandasına yardım edə bilməyəcək. İlk qarşılaşmada zədələnən Leandro Andrade ilə bağlı problem isə geridə qalıb. O, özünü yaxşı hiss edir və cavab matçına çıxa biləcək. Belədə “Qarabağ”ın heyət baxımından ciddi çatışmazlığının olmayacağı aydındı. Deməli, azarkeşlərin “Tofiq Bəhramov”da anşlaq yaratması, baxımlı futboldan və qələbədən zövq ala bilməsi üçün hansısa maneə yoxdu. Rəqibə gəlincə, komandanı dəstəkləmək üçün 100 irlandiyalı azarkeş də gəlib.

KƏNAN BAHADIR