Bu gün saat 19.30-da Tovuz şəhər stadionunda yerli “Turan Tovuz”la “Qarabağ” qarşılaşacaq.

Oyun ən müxtəlif səbəblərdən azarkeşlərin diqqət mərkəzindədi. Ən önəmli məqamlardan biri “Qarabağ”ın cari mövsümdə keçirilən əvvəlki üç oyundan heç birində tovuzlulara qalib gələ bilməməsidi (bir heç-heçə, iki məğlubiyyət).

Yaxşı, bu gün nəticə necə olacaq? Daha doğrusu, komandalardan hansı daha şanslıdı? Bəribaşdan deyim ki, zədəlilərin sayını (meydan sahibləri Marandiçi, Batista və Millerin, qonaqlar Məhəmmədəliyevin xidmətindən məhrumdu) çıxmaq şərti ilə ağdamlıların mümkün qələbəsindən xəbər verən heç bir dəlil yoxdu. Niyə belə düşünürəm?

Birincisi, ortada Kurban Berdıyevlə Qurban Qurbanovun duellərinin statistikası var. Türkmənistanlı mütəxəssis ilk üç oyunda uduzmayıbsa, dördüncüdə niyə uduzmalıdı ki?!

İkincisi, “Qarabağ”dan fərqli “Turan Tovuz” bu oyuna daha yaxşı hazırlaşıb. Çempion 8-i yerli, 4-ü legioner olmaqla 12 futbolçunu yığmaların düşərgəsinə göndərmişdi, tovuzlular bu mənada rahat olub. Berdıyev istədiyi taktiki sxemləri məşqlərdə yoxlayıb.

Üçüncüsü, “Turan Tovuz”un oyunçularının mənəvi-psixoloji durumu daha yaxşıdı. Azərbaycan yığmasının son bir həftədə iki oyunda uduzan uzvləri bu müddətdə həm də medianın və ictimaiyyətin ciddi təzyiqinə məruz qalıb. Belədə psixoloji tarazlığı qorumaq çətindi. Bu mənada tovuzlular ən azı bir addım öndədi.

Dördüncüsü, oyun Tovuzda keçiriləcək, deməli, yerli komandanı ən azı 6 min sadiq azarkeş dəstəkləyəcək. Düzdü, zəngin avrokubok təcrübəsinə malik “Qarabağ”ı azarkeş sayı, dəstəyi ilə təəccübləndirmək çətindi. Amma evdə, necə deyərlər, divarlar da kömək edir.

Beşincisi, bu gün “Turan Tovuz” qələbəyə “Qarabağ”dan daha çox ehtiyac duyur. Ağdamlılar 12-ci çempionluğun astanasındadı, üstəlik kubokun yarımfinalına da vəsiqə qazanıblar, tovuzlular isə ən azı 4-cü yeri qorumaq, mümkün olarsa, 3-cü pilləyə yüksəlmək istəyirlər. İş ondadı ki, 4-cü yer də müəyyən şərtlər daxilində avrokuboklara vəsiqə qazandırmaya bilməz.

Kəsəsi, biz “Turan Tovuz”un daha şanslı olduğunu göstərəm 5 məqam tapdıq, saydıq. Təbii, “Qarabağ” üçün də belə məqamlar tapmaq olar. Amma axtarmaq əvəzinə ekran önünə keçib, bu maraqlı oyuna baxmaq lazımdı.

Sonda onu da xatırladaq ki, “Qarabağ” 64 xall turnir cədvəlinin zirvəsində qərarlaşıb, “Turan-Tovuz” 43 xalla 4-cü pillədədi.

MÜZƏFFƏR QULUZADƏ