“Qarabağ” ölkəmizi tarixində 12-ci dəfə Çempionlar Liqasında təmsil edəcək.

Böyük ölçüdə olmasa da, yenilənmiş heyət yeni mövsümdə də dəyişməz hədəf uğrunda mübarizə aparacaq. Bəli, bu dəfə də məqsəd turnirin əsas mərhələsinə vəsiqə qazanmaqdı. Ağdam təmsilçisi buna tarixində cəmi bir dəfə - 2017/18 “futbol ili”ndə nail olub. İndi yenidən tarix yazmaq vaxtıdı! Ötən mövsüm Avropa Liqasında qeydə alınan məlum uğursuz nəticələri unutdurmaq, azarkeşlərin könlünü almaq, bükülən beli dirçəltmək, əyilən başı qaldırmaq vaxtıdı! İndi yenidən rəqiblərin qəlbinə “Qarabağ” xofunu yeritmək vaxtıdı!

Və bu yolda ilk maneə İrlandiya çempionu olan, birinci təsnifat mərhələsində Şimali İrlandiya klubu “Linfild”i mübarizədən kənarlaşdıran (1:0, 1:1) “Şelburn”du.

Əlbəttə, addım-addım uğura irəliləyəcəyinə ümid etdiyimiz “köhlən atlar”ı səfər oyunlarında ekran başından, ev matçlarında tribunalardan dəstəkləmək vacibdi. Sözügedən görüş üçün vəzifəmiz isə sabah axşam 22.45-də kanalı “CBC Sport”a çevirmək olacaq.

Çempionlar Liqası
2-ci təsnifat mərhələsi, ilk oyun
Şelburn (İrlandiya) – Qarabağ 0:3
Leandro Andrade, 11. Aleksey Kaşuk, 81. Nəriman Axundzadə, 84.
Hakimlər: ANTE ÇULİNA, Luka Puşiç, İvan Mihali, Mateo Erceq (hamısı Xorvatiya).
VAR hakimi: Mario Zebec (Xorvatiya).
VAR hakiminin köməkçisi: Tixomir Pejin (Xorvatiya).
23 iyul. Dublin. “Tolka Park”. Saat 22.45.

Sizi “Şelburn” haqda vacib məlumatlarla tanış etmişik. İrlandiya təmsilçisi nəinki avrokuboklarda, ölkə daxilində belə “dişə vurulası” uğurla yadda qalmayıb. Odu ki, “Qarabağ”ın məlum təcrübəsinə və gücünə inana, səfərdən qələbə ilə qayıdacağına şübhə etməyə bilərik. Axı Ağdam təmsilçisi Avropa meydanlarında qazandığı təcrübə və yüksək nəticələrlə mötəbər turnirin sayılan-seçilən komandalarından birinə çevrilib və xüsusilə “Şelburn” kimi rəqiblərə yerini göstərmək “Qarabağ” üçün su içmək qədər asandı.

Təbii ki, məqsədimiz nə rəqibə yuxarıdan aşağı baxmaqdı, nə də “Qarabağ”ın düşərgəsini arxayınlaşdırmaq. Hər halda, futbol belə şıltaqlıqları sevmir, hətta yeri gələndə cəzalandırır. Odu ki, ehtiyatı əldən vermək olmaz. Sadəcə, bu gün “Şelburn” azarkeşləri də “köhlən atlar”ın gücündən xəbərdardı və növbəti mərhələ üçün şanslarının az olduğunu dərk edir. Bunu tərəfdarların klubun rəsmi sosial şəbəkə hesablarının rəy bölümünə yazdığı fikirlərdən də anlamaq mümkündü. İrlandiyalı futbolsevərlər “Şelburn”u qələbəyə, onların dili ilə desək, imkansızı bacarmağa çağırır. Ümumiyyətlə, bu gün onların kollektiv ətrafında sıx birləşdiyini deyə bilərik. Əks halda, oyun üçün satışa çıxarılan biletlərin hamısı satılmazdı.

Komandaların heyətiylə bağlı müəyyən narahatlıq var. “Qarabağ”dan Aleksey İsayev hələ ötən ay əməliyyat olunduğundan, bu üzdən azı üç ay yaşıl meydanlardan uzaq qalacağından adı UEFA-ya göndərilən iştirak ərizəsində yer almayıb. Bir də Marko Yankoviç Bakıdakı son məşqdə zədələnib, ilk oyunu buraxacağı dəqiqdi.

“Şelburn”da isə Sean Qannon vərəqə cəzalısıdı. Sağ cinah müdafiəçisi 1-ci təsnifat mərhələsinin cavab matçında forma geysə də, komandanın aparıcı oyunçularından deyil. Həmçinin “Şelburn” ötən həftə “Arsenal”dan Cek Henri Frensisi transfer edib. Sonuncu dəfə İrlandiyada “Slayqo” klubunda icarə əsasında oynayan 21 yaşlı yarımmüdafiəçi İngiltərədə “Fulhem”in də şərəfini qoruyub. Baş məşqçi Cozef Obrayanın ona “Qarabağ”la matçlarda şans verib-verməyəcəyi bəlli deyil. Hər halda, klub hələ Frensinin adını iştirak ərizəsinə daxil etməyib.

Klubun mətbuat xidmətinin rəhbəri Anar Hacıyevin qəzetimizə verdiyi məlumata görə, “Qarabağ”ı stadiondan 100-ə yaxın azərbaycanlının dəstəkləyəcəyi gözlənilir.

KƏNAN BAHADIR