Klublarımız avrokuboklar çərçivəsində meydana çıxırsa, matçların taleyinin hansı ədalət təmsilçisinin əlində olması da önəmli məqamdı.

Hər halda, nə qərəzli qərarlarla üzləşmək istəyərik, nə də hansısa “fit sahibi”nin təcrübəsizliyinin qurbanı olmaq. Odu ki, UEFA-nın komandalarımızın matçları üçün təyinat verdiyi hakimləri daha yaxından tanımaqda fayda var.

Bilindiyi kimi, “Şelburn” – “Qarabağ” matçını Ante Çulina, “Zirə” – “Hayduk” oyununu Xristos Vargetis, “Araz-Naxçıvan” – “Aris” qarşılaşmasını Andrey Kivulete, “Petrokub” – “Sabah” görüşünü isə Qal Leyboviç idarə edəcək. İndi isə "Football-plus.az"ın ənənəsinə sadiq qalaraq, adı çəkilən referilərin karyerasına nəzər salaq.

Ante Çulina... 32 yaşlı ədalət təmsilçisi 2022-ci ildə Xorvatiyanın 1-ci liqa matçında debüt edib. Yəni referinin karyerası yetərincə zəngin deyil. Zamanla premyer-liqada da oyunlar idarə edən xovatiyalı bu çərçivədə meydana çıxdığı 57 oyunda 254 sarı, 23 qırmızı vərəqə göstərib. Beynəlxalq karyerası isə dediyimiz kimi rəngarəng deyil. O, beynəlxalq yoldaşlıq oyunlarında, 17, 19 və 21 yaşadək futbolçuların Avropa çempionatının seçmə mərhələ matçlarında, Gənclər Liqasında, Konfrans və Avropa Liqası qarşılaşmalarında iş başında olsa da, Çempionlar Liqasında debüt etməyib. Yəni “Qarabağ”ın görüşü Çulinanın karyerası üçün əlamətdar olacaq. Yəqin ki, ədalət təmsilçisi məhz bu məqam sayəsində işinə daha məsuliyyətli yanaşar. Referinin karyerası ərzində 147 matç idarə etdiyini, bu oyunlarda 644 sarı, 48 qırmızı vərəqə göstərdiyini xatırladaq. Belədə onun işində daha çox rəsmi xəbərdarlıqlara üstünlük verdiyini anlamaq çətin deyil.

Deməli, ehtiyatlı davranmaqda fayda var, əziz “Qarabağ”lılar...

Xristos Vargetis... “Zirə”nin bəxtinə daha təcrübəsiz hakim düşüb. Ona görə ki, 2022-ci ildən bəri bu işlə məşğul olan 36 yaşlı referi Yunanıstan superliqasında cəmi 25 matç idarə edib. O, bu oyunlarda futboçuları 148 sarı, 7 qırmızı vərəqə ilə cəzalandırıb. Daha çox ölkəsindəki çempionatlarda çalışan referi 17 və 19 yaşadək futbolçuların Avropa çempionatının seçmə mərhələ matçlarıyla yanaşı, Gənclər və Çempionlar Liqası oyunlarında meydana çıxıb.

Göründüyü kimi, Vargetis nə Avropa, nə də Konfrans Liqası matçında şans qazanıb. Ümumiyyətlə, indiyə qədər ona 85 matçda güvənilib. “Qarapaltarlı” bu görüşlərdə 467 sarı, 23 qırmızı vərəqəyə ehtiyac duyub.

Andrey Kivulete... Öz aramızdı, debütant “Araz-Naxçıvan” üçün daha təcrübəli hakim təyin edilib. 38 yaşlı ədalət təmsilçisi 2010-cu ildən bəri iş başındadı. Referi Rumıniya superliqasında idarə etdiyi 145 matçda 723 sarı, 42 qırmızı vərəqə göstərib. Kivulete Avropa Liqasında debüt etməsə də, Çempionlar və Konfrans Liqası qarşılaşmalarında şans qazanıb. Həmçinin referiyə 17, 19 və 21 yaşadək futbolçuların Avropa çempionatının seçmə mərhələsindəki görüşlərində və Gənclər Liqasının oyunlarında güvənilib.

Karyerası ərzində 291 qarşılaşma idarə edən Kivulete bu oyunlarda 1317 sarı, 73 qırmızı vərəqə üçün əlini cibinə atıb. Təcrübəsini və statistikanı nəzərə alsaq, rumıniyalının mərhəmətli davranış tərəfdarı olduğunu deyə bilərik.

Qal Leyboviç... 38 yaşlı “fit sahibi” karyerasını 12 ildi davam etdirir. O, İsrailinin əsas çempionatında xeyli təcrübə toplayıb. Dəqiq desək, 125 matç idarə edib ki, bu oyunlarda 565 sarı, 28 qırmızı vərəqə göstərib. Referi həm Çempionlar, həm Avropa, həm də Konfrans Liqası çərçivəsində meydana çıxıb. Amma karyerası bununla məhdudlaşmır. Ədalət təmsilçisinin hesabına beynəlxalq yoldaşlıq oyunları, 17 və 21 yaşadək futbolçuların Avropa çempionatının seçmə mərhələsindəki görüşlər, Gənclər Liqası matçları da var. O, indiyə qədər 312 matçda meydana çıxıb ki, bu qarşılaşmalarda 1308 sarı, 61 qırmızı vərəqə göstərib. Bu üzdən Leyboviçin əksər hallarda şifahi xəbərdarlığa üstünlük verdiyini proqnozlaşdıra bilərik.

Sonda adı çəkilən ədalət təmsilçilərinin ilk dəfə təmsilçilərimizin oyununda iş başında olacağını bildirək.

KƏNAN BAHADIR