Bu gün millimiz AÇ-2024-ün seçmə mərhələsi çərçivəsində Tofiq Bəhramov adına Respublika stadionunda İsveçlə üz-üzə gələcək.

"Football-plus.az" xəbər verir ki, saat 21.00-da başlayacaq oyunu qadın hakim idarə edəcək. UEFA idarəçiliyi isveçrəli Ester Staubliyə həvalə edib. Onun köməkçiləri Conas Erni və Süzanna Kyunq olacaq. Dördüncü hakim funksiyasını Mirel Turkes yerinə yetirəcək. Lukaş Fehndrix VAR hakimi, Lionel Çudi isə VAR hakiminin köməkçisi olacaq. İsveçrəli xanımın hakimlik fəaliyyətinə nəzər salaq.

Ester Staubli... 44 yaşlı referi 2000-ci ildən ədalət təmsilçisi kimi çalışsa da, 2006-cı ildə FİFA dərəcəsi ala bilib. Maraqlıdı ki, bundan sonra 2 il ərzində qurumun beynəlxalq təyinatlar siyahısında ona yer verilməyib. O, bu çərçivədə ilk matçını 2008-ci ildə idarə edib. Əvvələ qayıtsaq, karyerasının zəngin olduğunu deyə bilmərik. Əsasən İsveçrə çempionatının aşağı liqalarında meydana çıxan “fit sahibi” sərt cəzalandırma tərziylə yadda qalıb. Çağırış liqasında 60 oyun idarə edən Ester futbolçulara 262 sarı, 9 qırmızı vərəqə göstərib. Staubliyə superliqada cəmi 22 dəfə şans verilib ki, burda da dominantlığıyla diqqəti çəkib. Maraqlıdı ki, tez-tez etirazla üzləşən hakimə Olimpiadalarda və dünya çempionatlarında ehtiyac duyulub. O, 2016-cı ildə Rio-de-Janeyro, 2021-ci ildə Tokio Yay Olimpiya Oyunlarında, 2013, 2017 və 2022-ci illərdə Avropa çempionatında, 2015, 2019 və 2023-cü illərdə isə dünya çempionatında iş başında olub. Ədalət təmsilçisi daha əvvəl yalnız bir dəfə 17 yaşadək oğlanlardan ibarət yığmaların görüşünü idarə edib. İsveçrəli xanım 2017-ci ildə Hindistanda keçirilən dünya çempionatında Yaponiya - Yeni Kaledoniya (1:1) qarşılaşmasında ədaləti qoruyub. Ümumiyyətlə, o, indiyə qədər 264 dəfə meydana çıxıb, 1174 dəfə sarı, 59 dəfə qırmızı vərəqə üçün əlini cibinə salıb. Belə nəticəyə gəlmək olar ki, millimiz və klublarımız onun sərt cəzalarına məruz qalmayıb. Bu gün üçün özünü hansı tərəfdən göstərəciyini isə axşam görəcəyik.

KƏNAN BAHADIR