Bilindiyi kimi, “Qarabağ” evdə “Ludoqorets”i sınağa çəkəcək. Matçı isveçrəli hakim Urs Şnayder idarə edəcək.

"Football-plus.az" xəbər verir ki, 38 yaşlı ədalət təmsilçisi 2015-ci ildən bəri bu vəzifəni icra edir. O, həm də İsveçrədəki məktəblərdən birində idman müəllimi kimi çalışır. Karyerasına ölkəsinin aşağı liqalarında başlayan “fit sahibi” qısa müddətdə elita üçün şans qazanıb. Bu vaxta qədər superliqada 151 görüş idarə edən Şnayder 615 sarı, 26 qırmızı vərəqə üçün əlini cibinə salıb. Beynəlxalq qarşılaşmalarla bağlı karyerası isə o qədər də zəngin deyil.

Çempionlar, Avropa, Konfrans və Gənclər Liqalarında meydana çıxan hakim U-17, U-19 və U-21-lər arasında Avropa çempionatının seçmə mərhələ oyunlarında da ədaləti qoruyub. O, UEFA-nın A kateqoriyalı referilərindəndi. Şnayder isveçrəli hakimlər arasında sürətli qaçışıyla diqqəti çəkir, dəfələrlə bütün gücüylə hücuma keçən futbolçuları ötməklə azarkeşlərin marağına səbəb olub.

Ümumiyyətlə, Şnayder karyerası ərzində 391 oyun idarə edib. O, bu matçlarda 1592 sarı, 67 qırmızı vərəqə göstərib. İlk dəfə hansısa təmsilçimizin matçına təyinat alıb.

KƏNAN BAHADIR