David Yurasek, Temmi Abraham və Orkun Kökçü kimi isimləri heyətinə qatmaqla adından söz etdirən ''Beşiktaş''ın 4-cü transferi hələ ki, düyünə düşüb. Kayl Uoker-Piters heç cür İstanbula gəlib çıxa bilmir.
"Football-plus.az" xəbər verir ki, onun Türkiyəyə gəlişi 3-cü dəfə təxirə salındı!

İstanbul nəhəngi ''Sauthempton''dan ayrılan və sərbəst futbolçu statusunda olan ingiltərəli cinah müdafiəçisi ilə hələ ötən həftəsonu ilkin anlaşma əldə etmişdi. Amma şənbə günü gəlməli olan Uoker-Piters əvvəlcə şəxsi işləri ilə əlaqədar bazar ertəsinə qədər vaxt istədi. Bazar ertəsi də gələ bilməyən futbolçunun çərşənbə günü gələcəyi açıqlandı. Çərşənbə günü isə ''Beşiktaş''dan yenə rəsmi açıqlama gəldi.

Belə ki, 28 yaşlı oyunçunun bu dəfə ailəvi səbəblər üzündən yenə gələ bilməyəcəyi qeyd olundu. Onun Türkiyəyə nə vaxt ayaq basacağı ilə bağlı dəqiq məlumat yoxdu.

Qeyd edək ki, ''Tottenhem''in yetirməsi olan və transfer dəyəri 15 milyon avro civarında olan Uoker-Piters 2020-ci ildən bu yana ''Sauthempton''un şərəfini qoruyurdu. O, bu klubda ümumilikdə 202 rəsmi oyuna çıxaraq 7 qol, 12 məhsuldar ötürmə ilə fərqlənib.