''Beşiktaş''ı hələ ki, Türkiyədə bu yay transfer dönəminin ən fəal klubu adlandırmaq olar.

"Football-plus.az" xəbər verir ki, daha öncə çexiyalı David Yurasek və tanınmış İngiltərəli forvard Temmi Abrahamı heyətinə qatan İstanbul nəhəngi 3-cü transferini reallaşdırıb. ''Ağ-qaralar'' bütün həftəboyu danışıqlar apardığı ''Benfika''lı Orkun Kökçünün transferini tamamlayıblar. Türkiyə yığmasının üzvü dünən klub prezidenti Sərdal Adalı ilə birlikdə İstanbula gəlib.

Adalı özü şəxsən danışıqlar prosesində iştirak edirdi. O, çərşənbə axşamından Lissabonda idi. Adalı ilə Orkun hələ Lissabonda təyyarəyə minərkən qürbətçi fanatlar tərəfindən təmtəraqlı şəkildə yola salındılar. Hətta fanatlardan birinin Adalının ayağını öpməsi diqqətdən qaçmadı. Daha sonra Orkun təyyarədə olarkən maraqlı bir video çəkdi. Onun ''aləmin gözü yaşlı, Orkun Kökçü zatən ''Beşiktaş''lı'' ifadəsini işlətdiyi və qartal işarəsini göstərdiyi video klubun sosial şəbəkələrində paylaşıldı.

Nəhayət, yerli vaxtla saat 18.15-də Kökçü İstanbula ayaq basdı. O, hava limanında böyük izdihamla qarşılandı. 24 yaşlı futbolçu üçün bu gün ''Tüpraş Stadionu''nda görkəmli bir imza mərasimi təşkil olunacaq. Gün ərzində Kökçünün ''10'' nömrəli formalarının satışa çıxarılacağı və rekord sayda satılacağı gözlənilir.

Transferin maddi detalları isə daha öncə Türkiyə mətbuatında qeyd olunduğu kimidi. Orkun ''Beşiktaş''da ilk mövsümü icarə əsasında keçirəcək və ''Benfika''ya 5 milyon avro ödəniləcək. Ancaq müqavilədə məcburi transfer maddəsi var. Bu maddəyə qüvvəyə mindikdən sonra ''Benfika''ya daha 25 milyon avro ödəniləcək və futbolçunun özü ilə dördillik müqavilə imzalanacaq.