''Fənər''li futbolçunun ''Beşiktaş''a transferi düyünə düşdü
''Beşiktaş''ın ''Fənərbaxça'' ilə müqavilə müddəti başa çatan və sərbəst futbolçuya çevrilən Brayt Osayi-Samuel ilə şifahi anlaşma əldə etdiyini xəbər vermişdik.
Ancaq bu transferdə gözlənilməz bir olay yaşanıb. Danışıqlar üçün İstanbula gələn nigeriyalı futbolçu ''qartal'' ilə anlaşa bilməyib. Buna Osayi-Samuelin atasının əlavə istəkləri səbəb olub. Prezident Sərdar Adalı məsələ ilə bağlı Anadolu Ajansına verdiyi açıqlamada bunları deyib:
''Osayi-Samuelin atasının son anda dəyişən mənasız tələblərini nəzərə alaraq danışıqları dayandırmaq qərarına gəldik. Ancaq bu məsələyə birdəfəlik son qoymamışıq. Hələ də qarşı tərəfdən cavab gözləyirik. Daha öncə anlaşdığımız şərtlərə razılıq versə, transfer baş tutacaq. Əks təqdirdə alternativ variantlara yönələcəyik''.
Qeyd edək ki, daha öncə tərəflər arasında üçillik anlaşma əldə olunduğu vurğulanılırdı.
Xatırladaq ki, ''Fənər''ə 2021-in yanvarında 500 min avroya KPR-dən transfer olunan Nigeriya yığmasının üzvü geridə qoyduğumuz mövsümdə 39 rəsmi oyuna çıxaraq aktivinə yalnız 3 məhsuldar ötürmə yazıb.
''Beşiktaş''ın Osayi-Samueli heyətinə qatdıqdan sonra onun mövqeyində, yəni müdafiənin sağında oynayan Yonas Svenssonla yollarını ayıracağı gözlənilirdi.
Digər xəbərlər
