''Sivasspor'' və Albaniya yığmasının forvardı Rey Manayın yeni klubu bəlli olmaq üzrədi.

"Football-plus.az" xəbər verir ki, təcrübəli forvard Birləşmiş Ərəb Əmirlikləri təmsilçisi ''Əl-Şarja'' ilə bütün prinsipial məsələlərdə anlaşma əldə edib. Bu xəbəri insayder Saşa Tavolyeri paylaşıb.

Onun bildirdiyinə görə bu transfer ''Əl-Şarja''ya cəmi 2 milyon avroya başa gəlib. Transferin qısa müddət ərzində rəsmən açıqlanacağı gözlənilir. ''Qarabağ''a keyfiyyətli hücumçu lazım olduğu bir dönəmdə bu xəbəri məyusluq içində oxumamaq mümkün deyil.

Vaxtilə ''İnter'' və ''Barselona''da da top qovmuş 28 yaşlı forvardın səviyyəsi və təcrübəsi ilə təmsilçimizə xüsusilə avrokuboklarda çox böyük faydası dəyə bilərdi. Özü də onun ''Sivasspor''da qalmayacağı dəqiq idi. Çünki bu klub superliqada yerini qoruya bilməmişdi. Manay son iki mövsümdə Türkiyədə adından söz etdirməyi bacarmışdı.

O, ''Sivasspor''da 2023/24 və 2024/25-də ümumilikdə 63 rəsmi oyunda forma geyərək aktivinə 34 qol, 8 məhsuldar ötürmə yazdı.