Türkiyə yığmasının iki əsas mərkəz müdafiəçisi Çağlar Söyüncü ilə Merih Dəmiralın yeni klublarının adına aydınlıq gəlmək üzrədi.

“Football-plus.az” xəbər verir ki, artıq ''Lester''dən ayrılan və azad oyunçuya çevrilən Çağlar qarşıdakı günlərdə ''Atletiko'' ilə dördillik müqavilə imzalayacaq. Merihin durumu bir qədər fərqlidi. 35 yaşlı futbolçunun ''Atalanta'' ilə hələ 2026-cı ilə qədər müqaviləsi var. Amma onun baş məşqçi Canpyero Qasperrini ilə münasibətləri pozulub. Təcrübəli mütəxəssis Dəmiralın satılmasının əleyhinə deyil. Merih geridə qoyduğumuz mövsüm 28 rəsmi oyuna çıxaraq 1 qol vura bildi. O, mövsümün sonuna yaxın gününü yalnız ehtiyat oyunçular skamyasında keçirirdi. Bu arada ''İnter''in bu oyunçunun keçidini bitirməyə yaxın olduğu məlum olub. Milan təmsilçisi artıq təcrübəli müdafiəçi Milan Şkrinyarı əldən buraxıb. Elə Sezar Aspilikueta da ''İnter''ə keçmək üzrə olarkən son anda fikrini dəyişərək ''Atletiko''ya üstünlük verdi. Ona görə də ÇL-in son finalçısı diqqətini Merihə yönəldib. İtaliyalı jurnalist Fabritsio Romano bu transferin baş tutma ehtimalını yüksək qiymətləndirib.

Qeyd edək ki, Merih Dəmiral Türkiyə futbol tarixində transferinə ümumilikdə ən çox pul xərclənən futbolçudu. ''Fənərbaxça''nın yetirməsi olan Dəmirala görə 51 milyon avrodan çox pul ödənilib! Merih indiyə qədər 200 min avroya ''Sportinq''ə, 3,5 milyon avroya ''Alanyaspor''a, 8 milyon avroya ''Sassuolo''ya, 19,5 milyon avroya ''Yuventus''a və 20 milyon avroya ''Atalanta''ya transfer olunub.