Superliqa təmsilçisi ''Sivasspor'' Sərvət Çətinin istefasının ardından yeni məşqçisinə qovuşub.

"Football-plus.az" xəbər verir ki, klubdan verilən rəsmi açıqlamada Bülənt Uyğunla anlaşma əldə olunduğu qeyd olunub. Təcrübəli mütəxəssisi üçün bu gün imza mərasimi təşkil olunacaq. 52 yaşlı Uyğun bu camiə üçün əfsanəvi məşqçi hesab olunur. O, məşqçi karyerasına 2006-da məhz ''Sivasspor''da start verib. Həmin vaxt bu komanda elitada cəmi 2-ci mövsümünü keçirirdi. Uyğun təcrübəsiz olmasına rəğmən bu kollektivlə tarixi uğurlar əldə etdi. İlk mövsümdəcə ''yiğidolar'' ilə 7-ci pilləni tutan Uyğun 2007/08-də sivaslıları 4-cü etdi. Özü də həmin mövsümdə bu komanda 2-3-cü pillələri tutmuş ''Fənərbaxça'' və ''Beşiktaş''la eyni - 73 xal toplamışdı. 2008/09-da ''Sivasspor'' elitada tarixinin ən böyük uğurunu qazanaraq gümüş medallara sahib çıxdı və hətta Çempionlar Liqasının təsnifat mərhələsində oynamağa haqq qazandı. Amma bu turnirdə qrup mərhələsinə vəsiqə qazanmaq mümkün olmadı. Onun birinci Sivas macərası 2009-un oktyabrında başa çatdı. Uyğun o vaxtdan bu yana Türkiyədə ''Bucaspor'', ''Əskişəhərspor'', ''Elazığspor'', ''Qaziantepspor'', ''Osmanlıspor'', ''Kayserispor'', ''Denizlispor'', ''Çaykur Rizəspor'', vətənindən kənarda isə ''Umm Salal'', ''Əl-Qərəfə'' və ''Əl-Rayyan''ı çalışdırıb. Amma bu klubların heç birində ''Sivasspor''da əldə etdiyi uğurları təkrarlaya bilməyib.

ƏLİ