''Fənərbaxça''da növbədənkənar seçkilər üçün toplanılan imzalarla bağlı yeni xəbər var. Bilindiyi kimi müxalifət uzun müddətdi başqan Əli Koça qarşı imza toplamaqla məşğuldu.

"Football-plus.az" xəbər verir ki, klub üzvlərinin seçkilər üçün verdiyi imzalar rəhbərliyə təqdim olunub.

Bu arada ''Fənərbaxça Könüllüləri Dərnəyi''ndən verilən rəsmi açıqlamada ''kluba 9700 + 250 imza təqdim olunub'' ifadəsinə yer verilib. Hadisələrin bu cür axarından sonra Əli Koçun və rəhbərliyin nə açıqlama verəcəyi maraqla gözlənilir.

Qeyd edək ki, Koç növbədənkənar seçkilərin sentyabrda keçiriləcəyini açıqlayıb. Amma bu tarix müxalifəti qane etmir. Çünki həmin vaxt artıq mövsüm start götürmüş olacaq. Klubun daxili təlimatnaməsinə görə rəsmi üzvlərin ən azı 20 faizinin, yəni təxminən 9800 imza toplansa, rəhbərlik növbəti 30 gün ərzində növbədənkənar seçkilər keçirməli olacaq. İndi kluba təqdim olunan imzaların neçəsinin keçərli olub-olmadığı hesablanır. Aylıq üzvlük haqqını zamanında ödəməyən klub üzvlərinin imzası keçərli olmayacaq.

Qeyd edək ki, bu günlərdə Səadətin Saran da prezidentliyə namizəd olduğunu açıqlayıb. Bununla da namizədlərin sayı 4-ə yüksəlib. Daha öncə Hakan Bilal Kutlualp, Mahmut Uslu və Əli Koç özü namizədliyini açıqlamışdı.