Koça qarşı kampaniyada nə qədər imza toplanılıb?
Bu mövsüm iştirak etdiyi turnirlərin heç birində qarşıya qoyulan hədəfə çata bilməyən ''Fənərbaxça''da başqa Əli Koça yönələn etirazlar davam edir.
Hətta Koçun növbədənkənar seçkilər keçirməyə razı olması da ona yönələn tənqidlərin qarşısını almayıb. Çünki seçkilərin tarixi çox uğursuz seçilib. Koç bir neçə gün öncə sentyabrın ortalarında növbədənkənar seçkilərin olacağını və özünün də namizədliyini irəli sürəcəyini açıqlamışdı. Amma sentyabrda artıq yeni mövsüm start götürmüş olacaq. Yəni yeni seçilən rəhbərliyin mövsümə hazırlaşmaq, transferlər reallaşdırmaq üçün zamanı olmayacaq. Ona görə də Koça qarşı imza kampaniyası tam sürətlə davam edir.
Ən son məlumatlara görə, artıq 8 mindən çox imza toplanıb! Növbədənkənar seçkilər üçün 9246 imza toplanılmalıdı. Yetərli sayda imza toplansa, o zaman seçkilər iyunun ortalarında və ya ən gec sonlarında keçiriləcək.
Bu arada ötən həftə prezidentliyə namizədliyini rəsmən açıqlayan Mahmut Uslu da Əli Koça qarşı kampaniyaya imzasını verənlərdən biridi. O, bunları deyib:
''Uğursuz mövsüm bitdikdən 4 ay sonra seçkilər keçirmək ''Fənərbaxça'' tarixində görünməmiş bir şeydi. Əli Koç seçkilərlə bağlı qərar qəbul etməsə, ona qarşı mən də imza atacağımı söyləmişdim. Bu sözümün üstündə durdum. Artıq Koçdan yeni qərar gözləmək yersizdi. Bir an öncə yetərli sayda imza toplanılmalı və növbədənkənar seçkilər keçirilməlidi''.
İstefa vermək və ayrılmaq niyyəti olmayan Əli Koçun bu həftənin sonuna qədər iki mühüm görüş keçirəcəyi gözlənilir. Bunlardan biri Əziz Yıldırım, digəri Joze Mourinyo ilə olacaq.
Görüşdə Yıldırımın bəzi məsələlərdə Koça məsləhətlər verəcəyi gözlənilir. Mourinyo ilə görüşdə isə həm məşqçinin gələcək taleyinə, həm də yeni mövsümün planlaşdırılmasına aydınlıq gələcək.
