Prezidentliyinin 7-ci ilində də ''Fənərbaxça'' camiəsinin çempionluq həsrətinə son qoya bilməyən və yenə fanatların gözündən düşən Əli Koçun atacağı addımlar maraq doğurur.

Türkiyə mətbuatının yazdığına inansaq, Koç bu həftə əfsanəvi başqan Əziz Yıldırım ilə görüşərək ondan dəstək istəyəcək və klubun gələcəyini müzakirə edəcək. Bir tərəfdən prezidentliyə yeni namizədlər ortaya çıxırsa, digər tərəfdən Koç əleyhinə imza kampaniyası davam edir.

Hakan Bilal Kutlualp hələ ötən ayın sonlarında prezidentliyə namizədliyini açıqlamışdısa, son dönəmlərdə Əli Koçu ən çox tənqid edən şəxslərdən olan Mahmut Uslunun da bu günlərdə namizədliyini açıqlayacağı gözlənilir. Uslu Əziz Yıldırımın prezidentliyi dönəmində onun sağ əli hesab olunurdu. Klubun rəsmi üzvlərinin isə imza kampaniyası davam edir. ''Fənər''in daxili təlimatmatnaməsinə əsasən klub üzvlərinin 20 faizinin imzası toplansa, başqan məcburi şəkildə növbədənkənar seçkilər keçirməli olacaq.

Ötən ilki seçkilərdə klubun 46410 rəsmi üzvünün olduğu açıqlanmışdı. Bu da o deməkdi ki, seçkilər üçün Koç əleyhinə 9282 imza toplanmalıdı. İndiyə qədər toplanılan imza sayı ilə bağlı rəsmi açıqlama yoxdu. Bəzi mənbələr 3500, bəzi mənbələr isə 5000-dən çox imzanın toplandığını vurğulayır.

Qeyd edək ki, Əli Koç ''TRT Spor''un canlı yayınında verdiyi son açıqlamada yetərli imza toplanacağı təqdirdə növbədənkənar seçkilərdə prezidentliyə namizədliyini irəli sürməyəcəyini açıqlamışdı.