“Fənərbaxça” növbədənkənar seçkiyə gedir?
Çempionluq həsrəti 11 ilə çatan “Fənərbaxça” camiəsində başqan Əli Koça və idarə heyətinə etirazlar davam edir.
Artıq neçə müddətdi ki, Koçun əleyhinə imza kampaniyası aparılır. Klubun daxili təlimatnaməsinə görə növbədənkənar seçkinin baş tutması üçün rəsmi üzvlərin ən azı 20 faizinin imzası olmalıdı. “Fənər”in 46 mindən çox rəsmi üzvünün olduğunu nəzərə alsaq, ən azı 9200 imza toplanmalıdı. Rəsmi rəqəmər bəlli olmasa da, iddialara görə artıq 5 mindən çox imza toplanıb!
Bu arada Türkiyə mətbuatında bu mövzu ilə bağlı ortaya yeni bir iddia atıldı. Belə ki, şayiələrə inansaq, “Fənərbaxça” rəhbərliyi camiənin tələbini yerinə yetirərək növbədənkənar seçkiyə getməyə hazırdı. Seçkinin sentyabra təyin olunacağı bildirilir. Bununla bağlı ən qısa müddətdə klub tərəfindən rəsmi açıqlama veriləcəyi gözlənilir.
Seçkidən də vacib olan bir məsələ Əli Koçun yenidən namizəliyini irəli sürüb-sürməyəcəyidi. O, bir müddət öncə “TRT Spor”un canlı yayınında bu mövzuda danışarkən “yetərli imza toplanılacağı təqdridə növbədənkənar seçki olacaq və mən həmin seçkidə namizədliyimi irəli sürməyəcəm” açıqlamasını vermişdi. Amma ortada gəzən iddialara görə Koçun ayrılmaq fikri yoxdu.
“Fanatik”in və digər mənbələrin yazdığına inansaq, Əli Koç qarşıdakı növbədənkənar seçkidə yenidən namizədliyini irəli sürəcək!
Bu arada prezidentliyə namizədlərin sayı getdikcə artır. Daha öncə Hakan Bilal Kutlualp namizəd olduğunu açıqlamışdısa, srağagün Mahmut Uslu da bu vəzifəni yerinə yetirməyə hazır olduğunu bildirdi. Uslu mətbuat konfransında Əli Koçu belə desək, yıxıb-sürüdü. 77 yaşlı Uslu klubun əfsanəvi başqanı Əziz Yıldırımın sağ əli sayılırdı. O, Yıldırımın dönəmində təxminən 15 ilə yaxın “Fənər”də baş katib, mətbuat katibi və başqa vəzifələri icra edib. Uslu sərt açıqlamalar verərək bunları deyib:
“Yaşamadığımız hər şeyi Əli Koçun dönəmində yaşadıq. Yetər artıq, çıx get! Hər şey pulla ölçülmür. Ortada “Fənərbaxça” adına çox bərbad bir mənzərə var. Hörmətli başqan, sən artıq bu işi bacarmırsan. Bunu etiraf etmək ayıb deyil. Bəlkə də başqa bacardığın işlər var. Amma “Fənərbaxça” prezidenti olmağı bacarmadın! Bugünlərdə onun 2018-də verdiyi vədləri araşdırıb tapdım. İnsan verdiyi vədin, heç olmasa, birini yerinə yetirər! “Fənərbaxça”nın dərdi çempionluqdu. Bu camiənin çempionluğa ehtiyacı var. Uşaqlar artıq ağlayır. Sən, hər halda, xalqın arasında gəzmirsən, nə baş verdiyini görmürsən. Ona görə də artıq ayrılmaq vaxtıdı. 7 il ərzində ortada bir ciddi uğur yoxdu. Bir böyük qardaş kimi sənə sonuncu məsləhətimi vermək istəyirəm. İmza toplanılmasını gözləmədən özün ayrıl və bir qədər böyüməyə cəhd göstər. Üzərində işlə, ətrafını güclü isimlərlə doldur, bəzi şeyləri öyrən. Artıq vəziyyət o qədər ciddidi ki, insanlar imza toplamaqla da olsa, səni qovmağa hazırdılar. Əli Koç “Fənərbaxça”nın yaxşı heyətə malik olduğunu deyir. Talişka və Şkrinyardan başqa hansı oyunçunu “Qalatasaray” transfer etmək istəyər? Amma sən “Qalatasaray”dan ən azı 4-5 oyunçu almaq istəyərsən. Bu camiənin artıq birləşməyə ehtiyacı var. Bizim bu camiəni idarə etmək üçün təcrübəmiz də var, cəsarətimiz də. “Fənərbaxça” sahibsiz qalmayacaq. Prezidentliyə namizədliyimi açıqlayıram”.
Digər xəbərlər
