Türkiyə superliqasının bir klubunda sürpriz ayrılıq reallaşıbsa, digər klubunda yeni təyinat rəsmiləşib.

İstefa xəbəri “Kasımpaşa”dan gəlib. Belə ki, Burak Yılmaz İstanbul təmsilçisindən ayrıldığını açıqlayıb. O vida paylaşımında bunları yazıb:

Beləliklə, 40 yaşlı mütəxəssisin bu klubdakı dönəmi cəmi 5 ay çəkdi. Burak Yılmaz bu vəzifəyə yanvarın 30-da gətirilmişdi. Əslində onun müqavilə müddəti bitmək üzrə idi. İyunun 14-də klubdan verilən rəsmi açıqlamada Burak Yılmazla yola davam ediləcəyi vurğulanılmışdı. Hər kəs onunla yeni müqavilə imzalanacağını gözlədiyi vaxtda istefa xəbəri gəldi. “Kasımpaşa” bu məşqçi ilə 16 superliqa matçından 6 qələbə, 4 heç-heçə, 6 məğlubiyyətlə ayrılmış oldu. Yılmaz istanbulluları 8-ci pillədə qəbul etmişdisə, komanda mövsümü 10-cu yerdə tamamladı.

Yeni məşqçi təyinatı isə “Kayserispor”da reallaşıb. Belə ki, Sergey Yakiroviçin “Hall Siti”nin “sükanı arxasına” keçməsinin ardından məşqçisiz qalan Kayseri təmsilçisi bu vəzifəyə, gözlənildiyi kimi, Markus Gisdolu gətirib. Təcrübəli almaniyalı mütəxəssislə ikiillik müqavilə imzalanıb. Srağagün Gisdol üçün klubun stadionunda imza mərasimi kecirilib. Daha öncə “Hoffenhaym”, “Hamburq”, “Köln” və “Lokomotiv”də işləmiş 55 yaşlı məşqçinin son iş yeri məhz Türkiyə olmuşdu. O 2023/24 mövsümünün gedişində “Samsunspor”u düşmə zonasında qəbul etmiş və dirçəltməyi bacarmışdı. Daha sonra öz istəyi ilə Samsundan ayrılan Gisdolun güclü bir klubun başına keçəcəyi gözlənilirdi. Amma istədiyi təklifləri ala bilməyən məşqçi təxminəın 1 il işsiz qalandan sonra yenidən Türkiyəyə qayıtmağa üstünlük verib.

Gisdol “Kayserispor”un bazasını və şəraitini tərifləyərək klubun potensiallı, maraqlı futbolçulara malik olduğunu qeyd edib.