Türkiyə çempionatında istefa xəbərləri bitmək bilmir.

Bu dəfə növbə “Kayserispor”undu. Rəhbərlik Rəcəp Uçarla qarşılıqlı şəkildə anlaşaraq vidalaşıb. Əslində bunu gözləmək olardı. Çünki komanda son həftələrdə heç cür böhrandan çıxa bilmirdi. Kayseri təmsilçisi son 8 rəsmi oyunun hamısında məğlub olub ki, bu da klub tarixinin yeni antirekordudu. Halbuki “sarı-qırmızılar” mövsümə heç də pis başlamamışdı. Onlar 15-ci turdan sonra hətta 3-cü pillədə qərarlaşmışdı! Amma maliyyə problemlər uğurun davamının gəlməsinə imkan vermədi. 3 xalı silinən, sıxıntılar üzündən əsas qol silahı Tiamla vidalaşmalı olan “Kayserispor” 16-cı turdan bəri ciddi eniş yaşamağa başladı. Qeyd edək ki, Rəcəp Uçar bu vəzifəyə sentyabrın əvvəllərində, Çağdaş Atanın qalmaqallı istefasından sonra gəlmişdi. Komanda 48 yaşlı bu mütəxəssisin başçılığı altında 3-ü ölkə kubokunda, 18-i superliqada olmaqla 21 rəsmi oyundan 9 qələbə, 2 heç-heçə, 10 məğlubiyyətlə ayrıldı.

Yeri gəlmişkən, yeni baş məşqçi artıq bəllidi. Bu, Burak Yılmazdı. Srağagün Burakla 2,5 illik müqavilə imzalandı və o, yeni baş məşqçi qismində ictimaiyyətə təqdim olundu. Maraqlıdı ki, klub prezidenti Əli Çamlı imza mərasimində yarızarafat, yarıciddi şəkildə “hücumda sıxıntı yaşasaq, Burak Yılmaz özü meydana çıxıb oynayacaq” açıqlamasını verdi. Türkiyə futbolunun XXI əsrdə yetişdiriyi ən önəmli hücumçulardan olan 38 yaşlı Burak, bilindiyi kimi, ötən yay futbolçu karyerasını başa vuraraq məşqçiliyə addım atdı. O, mövsümə “Beşiktaş”ın məşqçilər korpusunda, yəni Şenol Günəşin köməkçisi kimi başladı. Sonradan İstanbul nəhəngi ciddi sıxıntılar yaşadı. Günəşin istefasından sonra Yılmaz baş məşqçi səlahiyyətlərini müvəqqəti icra etdi. Amma “ağ-qaralar”ın başında 6 qarşılaşmada 2 qələbə, 4 məğlubiyyətlik zəif nəticələrdən sonra istefa verməli oldu. Başqa sözlə desək, “Kayserispor” Yılmazın məşqçi karyerasının ikinci klubudu. O, dünən “Antalyaspor”a qarşı matçda debüt etdi. Maraqlıdı ki, Burakın “Beşiktaş”da köməkçisi olan xorvatiyalı Hari Vukas yeni klubda da onunla birlikdə işləyəcək.