Superliqa təmsilçisi ''Qaziantep''in hədəflərini böyütmək istədiyini və Sərgən Yalçına rəsmi təklif irəli sürdüyünü xəbər vermişdik.

Danışıqlarda əslən Antepdən olan Türkiyə Futbol Federasiyasının sabiq prezidenti Mehmet Büyükekşi də iştirak etmişdi. Amma Türkiyə mətbuatının yazdığına inansaq, təcrübəli mütəxəssisi Antepdə işləməyə razı salmaq mümkün olmayıb. 1 ildi, işsiz olan Sərgən Yalçın təklifi geri çevirib. Bu üzdən ''Qaziantep'' başqa variantlara yönəlib.

Yağız Sabuncuoğlunun xəbərinə görə bu komanda İsmət Taşdəmir ilə şifahi anlaşma əldə edib. Son detalların ardından 51 yaşlı mütəxəssislə birillik müqavilə imzalanacaq. İsmət Taşdəmir son iki mövsümdə iki komandanı elitaya daşıması ilə diqqət çəkib. 2023/24-də ''Bodrum'' məhz onun başçılığı altında tarixində ilk dəfə superliqada oynamağa haqq qazandı. Taşdəmir mövsümə bu klubun başında start versə də, 10-cu turdan sonra istefaya göndərildi.

Mövsümün gedişində isə Taşdəmir ''Kocaelispor''un başına keçdi. Bu kollektiv həmin an birinci liqada lider olsa da, Ərtuğrul Sağlam ilə vidalaşmağı lazım bilmişdi.

Taşdəmir lider olan komandanı qəbul edərək ümidləri doğrultdu və ''Kocaelispor''u 16 illik fasilədən sonra elitaya daşıdı. Amma onun ulduzu fanatlarla barışmadığı üçün Kocaeli klubunun rəhbərliyi bu məşqçi ilə yollarını ayırdı.