Növbədənkənar seçkilərdə qalib gələrək ''Beşiktaş''ın yeni prezidenti seçilən Sərdar Adalı baş məşqçi məsələsini mümkün qədər tez həll etmək istəyir.

Gözlənildiyi kimi o ilk növbədə Sərgən Yalçınla əlaqə saxlayıb.

"Football-plus.az" xatırladır ki, təcrübəli mütəxəssis ötən ay Covanni van Bronkhorstun istefasından sonra klubdakı qarmaqarışıqlığı əsas gətirərək baş məşqçi postuna gəlmək istəməmişdi. Onun yalnız yayda ''ağ-qaralar''ın başına keçmək istədiyi iddia edilirdi. Amma Sərgən sürpriz şəkildə təklifi elə indi də qəbul etməyə hazır olduğunu bildirib.

Türkiyə mətbuatının yazdığına inansaq, Sərdar Adalı ilə Sərgən artıq görüşərək yeni transferlər, ayrılacaq futbolçular və başqa məqamlarla bağlı müzakirələr aparıb. İndi bu təyinatın önündə dayanan yeganə maneə müqavilənin müddəti ilə bağlıdı. Sərgən heç vaxt uzunmüddətli müqavilələr imzalamır. O indiyə qədər işlədiyi klublarda əsasən birillik müqavilələrə imza atıb. Amma Adalı Yalçına 3,5 illik müqavilə təklif edib. Bu kiçik problem yoluna qoyulan kimi təyinat rəsmən açıqlanacaq və ''Beşiktaş''da ikinci Sərgən Yalçın dönəmi başlayacaq.

Son oyunlarda baş məşqçi funksiyasını icra edən Sərdar Topraktəpənin Sərgənin köməkçilərindən biri olacağı gözlənilir.

Xatırladaq ki, ''Qartal'' 2020/21-də qazandığı son çempionluğunu məhz Sərgən Yalçının başçılığı altında əldə edib.

ƏLİ