''Konyaspor''un ardından ''Bodrum''da da gözlənilən ayrılıq reallaşdı.

Superliqanın debütantı baş məşqçi İsmət Taşdəmir və onun köməkçiləri ilə yollarını ayırdı. 50 yaşlı mütəxəssis bu klubun tarixində iz buraxmağı bacardı. Belə ki, Taşdəmir 2021-də baş məşqçi vəzifəsinə gətirilərkən ''Bodrum'' 2-ci liqada, yəni 3-cü divizionda idi. Yəni komanda bu mütəxəssislə 3 il ərzində 3-cü diviziondan tarixində ilk dəfə elitaya qədər yüksəldi. Amma elitada uğurlu nəticələr əldə etmək mümkün olmadı. Son 3 tura cəmi 1 xal toplayan komanda 10 turdan sonra 10 xalla 13-cü pillədədi. Taşdəmir üçün klubun bazasında vida mərasimi keçirilib və o gül-çiçəklə yola salınıb.

Türkiyə mətbuatının yazdığına inansaq, klubun başına keçməyə əsas namizədlər Volkan Dəmirəl ilə Əmrə Belözoğludu. Bəzi mənbələrin iddiasına görə rəhbərlik artıq Dəmirəl ilə anlaşıb və bu təyinat qısa müddətdə açıqlanacaq. Amma rəhbərliyin Əmrə ilə anlaşmağa daha yaxın olduğunu iddia edənlər də var. Deyilənə görə rəhbərlik Fatih Terimlə də məsləhətləşib və ''İmperator'' məhz Əmrəni məsləhət görüb. Terim bilindiyi kimi ailəsi ilə birlikdə Bodrumda yaşayır. Əfsanəvi məşqçi bu mövsüm bir neçə dəfə ''Bodrum''un ev oyunlarını stadiondan izləyib.

ƏLİ